（左起）攝影師 Sky、會計師 Richard及審計員阿華均為八、九十後，跟練阿輝（右一）學潛水而認識，之後發現海底污染嚴重，自發潛水執垃圾。
壹些事壹些情
海底垃圾六不管
本港總共有二百六十多個島嶼，及七百三十多公里長的海岸線，政府每年平均收集約一萬五千噸海洋垃圾，但仍有成千上萬噸海洋垃圾未被清理，持續污染海灘和海岸線。
不過政府六大部門，只針對海岸、海面或指定海灘及保育區，進行垃圾清理，海底垃圾卻沒專責部門負責，令海底成為「六不管」地帶。
環境保護署更表明，由於海底範圍廣大，海底垃圾並沒對水質和生態構成嚴重影響，政府無計劃定期清理海底垃圾，只透過珊瑚礁普查後安排承辦商清理，或聯合潛水總會舉辦海底清潔活動，但所收集到的垃圾量，每次只以數十公斤計。
民間團體或潛水愛好者卻發現，海底垃圾「多到無法想像」，單是西貢對開海底，廢棄魚網（鬼網）已達數十噸計，批評政府的海底清潔工作過時，「只係清潔工人出海打撈吓海面，海底嘅完全冇人理。」環保團體亦批評政府相關政策不合格。
當海底垃圾被魚類誤吞後，將威脅整個食物鏈，最終受害的也是人類健康。
香港嘅海底垃圾其實好多，膠樽、玻璃樽同發泡膠最常見。岸上大家睇到會執，但水底根本睇唔到，所以被忽略……可能有人開完派對或者從海灘沖落去，呢啲都會破壞海洋生態。」潛水愛好者 Sky和兩名朋友數月前，開始趁週末出海清理海底垃圾，一切源於早前在西貢火石洲潛水的「恐怖」經歷。
目擊海底災難會計師潛水執垃圾
「火石洲有好多海葵同小丑魚，我哋叫小丑林。嗰日我哋落水見到有個好大嘅魚網，間開小丑林，啲魚想返屋企，就試圖穿過魚網，結果被纏住。」跟 Sky一起下海的會計師 Richard憶述，當時他們立即用刀開魚網，「但因為魚網已經纏住佢哋，我哋只可以（嘗試）放佢哋出嚟……當時有啲魚死咗，有啲奄奄一息，有啲割傷咗。」
自此他們一行三人，開始潛水執垃圾，至今只出海數次，已在西貢橋咀海底發現意想不到的垃圾，包括生銹的煲、鐵枝、車呔，甚至整道木門，由於部分垃圾太重，沒法搬上岸。他們認為單靠市民自發，力量完全不足，希望政府能立法派人落海巡查及清理垃圾。
環境保護署回覆指，海底涉及廣大範圍，海底垃圾並沒對水質和生態構成嚴重影響，政府無計劃定期清理海底垃圾，漁護署會「視乎情況及需要」，清理在海岸公園範圍內的海底垃圾。
民間團體撈鬼網永遠清唔完
環保署又指每年珊瑚礁普查，潛水人員會記錄棄置魚網地點，安排承辦商清理，去年收集共重九十八公斤（約 0.1噸）魚網；又聯同香港潛水總會舉辦海底清潔活動，今年九月，收集了三十六公斤垃圾。但民間團體「鬼網追擊行動組」不足半年間，已在西貢碼頭對開海底，執拾到數十噸魚網。
行動組籌劃人 Kitti說，在小島羊洲附近發現大量塑膠、玻璃樽和鬼網，「有唔同大細，有啲刻意一捆掉（落海），有啲（鬼網）係成個好長嘅喺水底，而且只喺淺水區。」她感覺垃圾永遠清不完：「羊洲有超過三十幾噸鬼網，做咗二十幾次行動，（終於）清咗九成。」
半年來，她多數撐獨木舟出海清理海底，但要解決鬼網問題並不容易，「解網我花咗二十分鐘，好辛苦，之後再用個半鐘去解裡面（纏住）嘅生物。」更曾因撈起大量鬼網導致反艇。她又在羊洲另一邊碼頭附近海域，發現很多發出異味的黑色膠袋，「我叫佢做膠袋島」，附近一個小海灣，亦有大量啤酒罐及汽水罐，她曾多次清理，但仍有大量垃圾。
漁民：幾十年前只有海草
海底垃圾難清理，收集後處理亦不容易。 Kitti無奈道：「我哋試過將鬼網放喺垃圾桶旁邊同垃圾站，但俾食環署阿姐鬧，話啲垃圾唔可以放喺嗰度。」她惟有將鬼網放在羊洲廢屋，之後由義載船長將鬼網送去碼頭，再由義工幫手搬上碼頭，再送給事前已聯絡的食環署人員。
對於海底垃圾來源， Kitti稱聽聞有人為慳時間，刻意開船到海中心傾倒垃圾，但不知是什麼人。她批評政府沒有認真處理海底垃圾問題，「停留喺十年、二十年前嘅水底清潔工作，只係清潔工人坐艇出海打撈吓海面，海底嘅就完全冇人理。」身為義工的她坦言，不介意將自己弄得像個垃圾婆，但期望政府落實海底清潔工作。
西貢海底垃圾問題，亦令漁民受影響。自小在西貢長大的漁民羅先生指，近年魚量愈來愈少，捕魚時經常發現大量膠袋及膠樽，有新有舊，「咩垃圾都有……幾十年前，一定冇呢啲垃圾，當年捕魚只會有海草。」更甚的是現時魚獲「死多過生」，烹煮後的鮮味亦比以前差很多，令到生意大減。
六大部門懶理海底垃圾
五年前，強颱風韋森特掠過華南沿岸，在果洲群島以東水域，將六個貨櫃吹落海，裡面載有一百五十噸塑膠產品原材料的聚丙烯膠粒，引發塑膠粒洩漏災難，政府成立由環保署協調的海岸清潔跨部門小組（下稱小組），檢討和制定改善海岸清潔措施。
當中六大部門負責不同範疇清潔（見表），包括康文署及食環署，負責清潔海灘和沿岸地區；海事處負責清潔海面；漁護署則負責海岸公園及海岸保育區清潔。環保署強調，清除海底垃圾既不容易，也不能頻密進行，以免影響生態，更有效方法是透過源頭控制，或舉辦宣傳及教育活動。
內地船亂棄垃圾數百噸進港水域
由二○一四年至去年，世界自然基金會香港分會（ WWF）推行「育養海岸計劃」，經調查發現在海洋垃圾中，逾六成為塑膠製品。項目經理楊松頴指當中大部分是即棄用品，主要是陸地或海上及海邊康樂活動產生。他指假如海洋生物不小心吞食塑膠垃圾，有機會阻塞腸臟，輕則損害健康，重則餓死。
去年休漁期後，有漁民反映捕魚期間撈獲大量塑膠垃圾。楊解釋：「內地有垃圾船非法處置垃圾，原本嗰啲垃圾船收集咗垃圾，應該運去指定地點處理，但係佢哋就貪小便宜，收集咗啲垃圾後就倒落去河口位置，廣泛影響到珠江口附近海洋生態環境，令漁民生計嚴重受損。」雖然事件被揭發後，內地部門加強執法，但數以百噸計的垃圾，已從珠江流入本港水域。
鬼網威脅
潛水員性命
楊松頴續解釋，鬼網多來自漁民落網後，因遇上惡劣天氣或魚網卡在石縫或珊瑚中，而被迫棄網，「可能啲魚網會被風吹散晒，散落喺海底。但根據我哋同漁民溝通，特登丟棄魚網情況唔算太多，因為魚網都有一定嘅價值，所以漁民都會珍惜，唔會隨便亂咁丟棄。」
有漁民向他透露，見過內地漁船因被發現非法捕魚，為求逃脫而棄網在海中心。楊松頴指鬼網亦會直接影響漁民生計，例如魚網被鬼網纏住，或鬼網令生態受損，從而造成漁獲減少。
「鬼網其實對生態同潛水人士，都係一個嚴重威脅。」他又指，鬼網雖已被廢棄，但仍會繼續「捕捉」魚類或蝦蟹，海洋生物如被鬼網、布袋或膠袋等纏住，最終會因不能進食或窒息而死。「香港嘅情況水底環境比較混濁，有時候潛水員唔覺意被鬼網纏住，如果佢經驗不足或者冇適合嘅工具幫手，都係一個威脅。」
環團：港府環保政策肥佬
事實上，海洋污染問題愈趨嚴重。根據聯合國數據，全世界每年有一千二百萬噸塑膠垃圾流入海洋。綠色和平項目主任 Andy指出：「每一日就有四十八億粒微塑膠流入本港海域，每年就有相等於一百一十一架雙層巴士重量嘅微塑膠倒入海。」情況令人震驚。
綠色和平報告發現，本港有逾百種海洋生物，大部分是市民經常食用，例如龍蝦、烏頭和藍鯨吞拿魚，「佢哋體內證實有唔同數量嘅微塑膠……海洋生物辨別唔到邊啲係膠，邊啲係微生物。佢食膠，我哋就食魚。」 Andy補充。
以微塑膠項目為例，綠色和平曾跟本港、台灣及韓國政府一齊做研究，兩地政府其後都就立法制訂時間表，以規定零售商不可再出售含微塑膠產品，唯獨港府無動於衷，我哋搵過相關部門，佢哋話微塑膠唔喺立法進程中。政府就回應話世衞檢測表中，冇話要檢測微塑膠。
Andy批評政府部門間不協調，政策亦跟不上進度，「香港問題係回收做得唔好，又唔去限制財團，可能係快餐店、跨國企業、超級市場，佢哋每日派膠。」○九年政府收集全港塑膠，可回收比率近六成，但至前年只剩一成，「反映政府回收成績每況愈下，如果講數字，係唔合格。」
外國民間獲資助清理海洋垃圾
事實上，外國不少國家的海岸線，比本港長得多，她們面對的海洋垃圾問題亦比本港更嚴重，但近年也想出各種方法應對，值得香港政府參考。
WWF項目經理楊松頴（下圖）舉例指，歐洲漁民對清理海洋垃圾較積極，除了自願性質收集垃圾，亦可向歐盟漁業部門申請資助，於休漁期清理海洋垃圾，成為「另類收入」。
另外，美國當局以政府資助，加上民間智慧，應對海洋垃圾問題。美國國家海洋及大氣管理局，提供清除海洋垃圾的資助給民間機構。去年撥款項目包括清除魚網、廢棄漁船及失修木樁等，又曾撥款給 The Alliance for the Great Lakes，處理底特律市 Belle Isle海岸約二百公噸垃圾。
撰文:時事組
攝影:林金展李育明
news@nextdigital.com.hk
|
鍾意就快D Share啦！
|
|
|
