Yumiko即化身慈母踎低氹女。
探熱針
Yumiko湊女有進步梁浸浸當街扭計都搞得掂
鄭希怡（ Yumiko）湊住兩歲半愛女梁子柔（梁浸浸）參加內地真人騷《不可思議的媽媽》，作為新手媽咪的 Yumiko，起初經常俾梁浸浸搞到情緒失控崩潰鬧女，但熱身過後，兩母女感情更進一步。日前返到香港， Yumiko繼續做潮媽帶住阿女去 shopping，行到攰的梁浸浸在中環大街扭計， Yumiko即化身慈母踎低氹女，場面溫馨！
當街扭計
Yumiko同化妝師梁學儲（ Andy）的寶貝女梁浸浸，天生一頭曲髮，眼仔碌碌又成日整古做怪，出世冇耐已經人氣高企，有阿女帶挈，早前 Yumiko同梁浸浸母女檔參與拍攝內地真人騷《不可思議的媽媽》搵真銀！節目出街後，起初 Yumiko表現得無乜耐性，成日崩潰鬧女，搞到她被質疑平日湊女靠晒工人、甚少親力親為照顧女兒，但始終都係新手媽咪，照顧小朋友方面大有進步空間。
日前一身潮媽打扮的 Yumiko帶着囡囡梁浸浸現身中環 shopping，行足粒幾鐘， Yumiko一手孭住幾大袋戰利品，另一手就拖實囡囡，準備過馬路時，梁浸浸突然扭計唔肯行， Yumiko冇發脾氣之餘仲耐心地踎低安慰阿女，着住牛仔連身裙嘅浸浸扭到露出尿片兼甩頭箍，場面搞笑，而 Yumiko迅速幫阿女整頓完一輪之後就氹掂上車走人！
計劃追多個
一二年同化妝師梁學儲（ Andy）結婚的 Yumiko，本來和丈夫協議唔生 B，後來意外懷孕有咗梁浸浸，生完之後都話明唔再追多個，但自從上完節目， Yumiko面對九個小朋友都搞得掂之餘，又見梁浸浸同其他小朋友相處融洽，令 Yumiko改變心態。
「 Yumiko之前一直都話自己湊一個小朋友都未搞得掂，所以擔心再多一個會好吃力，但佢最近竟然好雀躍同我哋講，話想趁自己後生生多個，等梁浸浸有個伴，仲話如果係仔就圓滿！」 Yumiko身邊人說。
撰文：娛樂組
攝影：何子洋、蕭敬漁
|
鍾意就快D Share啦！
|
|
|
