坦白講
我是蕩婦
六年前，加拿大多倫多市一名警察到大學演講時公開表示：「女性要避免性侵，就不應穿得像蕩婦般暴露。」這句說話觸發民眾不滿及國際關注，衍生出「蕩婦遊行」，目的是扭轉一種偏見，即婦女遭強暴因不檢點在先。三十八歲香港區遊行發起人 Angie Ng生長於保守家庭，曾在火車上被揶揄是「免費雞」，為爭取女性權益而站出來，令她榮登 BBC本年度「百大女性」。
我生於一個超級保守嘅家庭，屋企人喺我讀大學之前，要我十二點前返屋企，覺得女仔唔應該太性感，出嚟做嘢先可以識男朋友。不過自從我搞遊行之後，佢哋嘅思想俾我改變咗，唔會反對我企出嚟。
我父母幾十年前移民加拿大，我喺當地出世，大學同博士學位都係社會學。呢科影響我去參加唔同類型嘅社會運動，除咗女權運動，我仲參與爭取動物權益同環保議題嘅遊行。
大家經常喺香港，聽到啲好難聽嘅說話去形容女性，例如「抵你死」、「攞嚟衰」、「食得鹹魚抵得渴」，我覺得好難聽。如果受過性暴力嘅女性聽到，會更加難受。
我記得有次喺中文大學坐火車，有個外國男性朋友同我一齊，我冇著成點，但坐我隔籬一個香港男大學生，見到我同朋友就好大聲咁講：「呢啲咁嘅貨色喺大陸兩千蚊都有，玩成個禮拜都得」仲講咩「免費雞」、「醉酒雞」，當時佢唔係面對我講，係望另一邊，但好明顯係俾說話我聽。
如果有人冇著衫出街，我都會好奇望一望。但唔會好似一啲男人（平時睇女人）咁，用一種好唔尊重嘅眼光去睇，好似覺得人哋係一嚿豬肉，擺出嚟任人睇，人哋都會唔舒服。二○一一年，我參加咗多倫多「蕩婦遊行」，發現原來香港冇，於是喺香港嘗試舉辦，睇吓有冇人參與。
行咗咁多年，最有成效係見到一班每年都會返嚟參與遊行嘅人，傳媒亦愈嚟愈關注。入選 BBC百大女性當然好開心，其實我唔知邊個提名，突然有人通知我入選。我覺得好榮幸，因為可以令多啲人知道蕩婦遊行，最重要係大家嘅回應，令我得到更多肯定。
撰文:何紫
攝影:林金展
news@nextdigital.com.hk
|
鍾意就快D Share啦！
|
|
|
