沈嘉偉做廿四孝老豆湊女放學，兩父女拍住拖去食晏。
探熱針
前世情人嗲到暈，沈嘉偉同倒模邱淑貞淺水灣煙韌拍拖
49歲的靚媽邱淑貞， 99年嫁俾 I.T主席沈嘉偉，息影後連生三個女。三個囡囡當中要數人氣最高，肯定係大女沈月，盡得媽咪真傳，樣靚身材正，唔止迷倒一眾宅男，連老豆都俾佢嗲暈！本刊呢日發現沈月陪爸爸去淺水灣食晏，兩人全程繑到實一實，沈月又時不時挨落爸爸膊頭，十足十拍拖一樣。 16歲女都仲咁黐身，難怪沈嘉偉對住呢個前世情人，都冧到暈陀陀喇！
後繼有人
九十年代性感 icon邱淑貞（豆斗），終於後繼有人，大女沈月今年十六歲，同阿媽生到餅印一樣，被喻為「最索星二代」，二女沈日走 cutie路線一樣得人鍾意，孻女沈晨就被指最似媽咪，一屋都係女，沈嘉偉冇詐型之餘，仲不知幾 enjoy。
生女始終黐老豆，沈月亦唔例外，呢日沈嘉偉又做「跟得爸爸」，接沈月放學，當日著住校服的沈月，束起了髮髻，露出雪白長腿，清純學生妹造型一樣省鏡。放學後兩父女「拍拖」去淺水灣醫肚，最後揀咗港式餐廳「粥粉麵飯」，在近門口位置坐低。沈月要黐實老豆，專登同沈嘉偉排排坐，仲坐得勁埋。嘢食未到，沈月仲一直繑實爸爸唔放手，好彩沈月當日著住校服，如果唔係分唔出，以為沈嘉偉同邱淑貞拍拖撐枱腳。
廿四孝老豆
圈中有不少公認的好爸爸，錫仔女錫到燶，萬事以家庭行先，即使工作幾忙亦都會騰出時間陪小朋友。
李克勤
一向以老婆和囝囝行先的李克勤，就算幾忙都堅持親自湊仔返學。早前，更唧出空檔，安排家庭樂，在 35° C酷熱高溫下，一家四口到淺水灣沙灘進行下水禮，陪囝囝玩沙。
嗲暈老豆
要 keep住淑女儀態，沈月全程歎慢板，細細啖放入口，食快餐都食足成個鐘。之後兩父女開始邊篤電話邊吹水。傾到興起，沈月仲挨落爸爸膊頭，好鬼嗲！俾寶貝女電到暈的沈嘉偉，一臉慈父笑容。食完嘢，沈月一路繑實老豆行去攞車，發現記者，沈月顯得有點怕醜，低頭匿喺爸爸後面，加快腳步走人。
嚴加看管
囡囡咁省鏡，肯定引埋唔少狂蜂浪蝶，做阿爸阿媽都咪話唔擔心，幾個月前沈月就被撞破密會一名年約二十歲，貌似韓星李敏鎬的少年，豆斗表面扮「開通」，實質已加強監管，日日同老公輪更親自接放學。
「個女咁靚女，多人追都好平常，不過做父母點會想個女咁細個拍拖，唔多唔少都會影響學業㗎嘛！不過佢哋都知冇得夾硬嚟，惟有自己睇實啲！」豆斗身邊人透露。
唔夠細妹嗲
返學有老豆跟實，連放假都係家庭樂，唔使著校服，沈月換上一身潮 look，紅色衞衣襯牛仔短裙，將長髮放下，頭頂上面插住黑超。化咗淡妝的沈月，五官輪廓更加標致，驟眼睇同豆斗簡直倒模一樣。
當日沈嘉偉一拖二，帶住沈月同孻女沈晨現身 IFC，話明孻女孻心肝，沈嘉偉全程拖實沈晨，又肉緊搣阿女面珠，但沈月呢日就 cool得多，同老豆冇乜兩句，不過就幫手拎住戰利品，果然有大家姐風範！
撰文：娛樂組
攝影：瀚鍾
|
鍾意就快D Share啦！
|
|
|
