2017年11月23日 星期四

黃浩銘「逃獄」現身社民連黨慶 [壹週刊 - 1446] __,黃浩銘,黃浩,M1,

雖然阿銘嚟唔到黨慶,但係就寫咗封信俾黨友。八卦陣黃浩銘「逃獄」現身社民連黨慶上星期六晚,社民連十一周年黨慶,主席吳文遠好high咁宣布,社記破紀錄筵開 ...






雖然阿銘嚟唔到黨慶,但係就寫咗封信俾黨友。

八卦陣

黃浩銘「逃獄」現身社民連黨慶

上星期六晚,社民連十一周年黨慶,主席吳文遠好 high咁宣布,社記破紀錄筵開八十六席。黨慶固然開心,但其實今年社民連受嘅打擊都幾大。唔單只黨內唯一立法會議員長毛被 DQ,吳文遠上個月尾嘅「三文治案」普通襲擊罪成,正保釋等候上訴,加加埋埋十二個行委會成員入面,一半坐緊監或者面臨監禁。





上年社記黨慶擺六十圍,今年就激增到八十六圍,支持者話因為見到抗爭者受壓迫,所以一定要嚟撐場。

副主席黃浩銘坐監三個幾月,但星期六竟然「出席」黨慶。原來為咗等佢唔好缺席,社記成員整咗個阿銘人形紙板公仔出嚟,出席者喺開席前更加大排長龍,就係為咗同「阿銘」合照。吳文遠話,之前黨慶有阿銘搞氣氛又周圍同人飲酒,所以仲帶埋「阿銘」上台,一齊祝酒。

黃浩銘亦以「不畏威權繼續燃燒」為題,寫咗封信賀社記黨慶。佢承認今年係「社民連有史以來最艱苦的一年」,「我們今天從事的每個抗爭,也是承載着對後世的關懷愛護,不欲自己長大的地方沉淪,就要持守希望,努力奮鬥。」

佢仲話喺獄中每日閱讀學習、不停鍛鍊身體,為咗出番嚟之後,可以更強壯咁同黨友並肩作戰。

尖啤五萬蚊賀社記斥李飛「莫名其妙」





馬龍(中)呢幅畫以五萬元賣出,全靠毛姨姨(右)幫尖啤(左)叫高個價。

社民連黨慶有泛民人撐場唔出奇,毛姨姨、慢必、朱凱廸、羅冠聰同戴耀廷都有出席。上年黨慶,前主席陶君行飲到 high high哋,台上講笑大嗌「民主黨,賣香港」,又話「民主黨,正契弟」,搞到林卓廷黑面走人。今年民主黨都叫俾足面,雖然林卓廷冇嚟,但劉慧卿、何俊仁同許智峯都有到場,拍賣嗰陣仲買咗幅字畫。

當晚仲有個重量級人馬嚟咗,就係「尖啤」劉夢熊喇!拍賣籌款嗰陣,坐主家席嘅尖啤好疏爽咁用五萬蚊,買咗政治漫畫家馬龍嘅畫,佢唔單只覺得呢個價超值,仲話要向馬龍表示「敬意」。

尖啤喺台上面滔滔不絕,大讚長毛「有情有義」,反觀佢當年嘅「同志」就「有黨性,冇人性」,事關長毛喺佢入獄期間探咗佢三次,捐五萬蚊係「聊表謝意」。

出獄後嘅佢,言論真係愈嚟愈大膽,佢仲向《壹》仔大鬧基本法委員會主任李飛早幾日嚟香港講《基本法》「語出驚人」,逐一駁斥李飛講嘅嘢,話佢嘅訓示「令人莫名其妙!」

傳三大惹火人獲「祝福」做港區人大

港區人大代表選舉下個月舉行,最近江湖流傳一份「推薦名單」,聲稱名單上嘅人有望得到北京祝福而當選,唔少近期「惹火」人物,都榜上有名。

上榜嘅包括律師會前會長林新強,佢三年前高調為《一國兩制白皮書》護航,話白皮書「要求法官需要愛國」嘅部分冇問題,因為愛國係公民責任,又讚共產黨「好偉大」,結果律師會舉行特別會員大會,高票通過罷免佢。另一位上榜嘅法律界人物係陳曼琪,佢嘅成名作,當然係雨傘運動後期,代表旺角潮聯小巴申請禁制令,反佔中有功。

至於最近為國歌法護航嘅前港姐鄺美雲,亦喺名單上,佢話身為中國人,就要唱國歌,要感恩自己係中國人。其實早喺一五年政改表決前夕,佢就曾經現身「保普選、反暴力」街站簽名撐政改。舊年政府突然宣布,喺西九文化區起故宮文化博物館,鄺美雲都撐。喺香港,同樣係演藝界出身嘅人大代表,就有做過四屆政協委員嘅汪阿姐。







林新強三年前被罷免後,今次隨時「敗部復活」,成為港區人大代表。





前港姐亞軍鄺美雲有傳亦受「祝福」,相信有機會成為港區人大代表。





活躍於反佔中嘅律師陳曼琪都有傳喺「祝福」名單之上。

劉銳紹:當選人屁股決定腦袋





劉銳紹話,民主派選委要搞亂西環配票唔容易,因為有關方面已經做足防範。

究竟呢類惹火人物上位嘅背後,解讀到咩呢?資深時事評論員劉銳紹認為,外界唔需要太關注邊啲人當選,因為即使有形象較中間嘅人成為港區人大代表,最後都係「屁股決定腦袋」,稍為唔聽話、有獨立思考都會受壓,要修正自己嘅行為。例如○八年北京奧運開幕前,有香港記者被搶相機,某人大代表曾經爭取攞番,但有關方面通知佢唔好再過問,結果不了了之。

浸大新聞系高級講師呂秉權就覺得,人大系統換上更有戰鬥力嘅人,相信係習近平要喺中共百周年黨慶前,鎮住香港局面,包括準備完成廿三條立法。佢又舉例指陳曼琪活躍於反佔中,喺北京眼中係識法律,有一定嘅包裝、溝通能力同戰鬥力,係幾合用嘅人才。

至於呢張「祝福名單」有幾可信?夫子話過去幾屆選舉前,選委之間都流傳「祝福」名單,最後除咗一、兩名人選有唔同,結果同名單大致一樣。呂秉權就相信,名單係各路消息拼湊而成,相信官方希望有名單喺手,控制唔同界別代表嘅比例。

依家民主派有二百二十五名人大選委,佔總數十分一,有民主派選委話要追擊林新強、陳曼琪呢類惹火人物,搞亂西環配票。但夫子覺得官方有差池機會率好低,因為傳聞有關方面為防範對家偷襲,連隱形民主派都要力阻當選,鬥爭思維好強。

撰文:巫不言


鍾意就快D Share啦!
Related Posts Plugin for WordPress, Blogger...