探熱針
人妻無避忌樂基兒凸腩任睇
啱啱做咗朱太無耐的樂基兒，事隔十三年埋位拍電影《女士復仇》。導演睇準 Gaile是 super model，強烈要求戲服走性感路線，夾啱女主角正在蜜運中，心廣體胖收都收唔到，難得鬼妹仔無事不可對人，全程任拍，凸腩現晒形都無避忌！
最無所謂
《女》片由鄧麗欣、周秀娜同樂基兒擔正演出，導演原定安排咗超性感戲服俾三位女主角，但另外兩位對戲服意外地有意見，唔係怕走光，就怕鬼祟肉走漏眼，即使部分肯妥協穿著，但拍攝時都分外謹慎，唔想喺鏡頭前獻醜。偏偏蜜運到心廣體胖的 Gaile，見到性感的戲服勁興奮，「呢個打扮都未試過，比起行 show嗰啲唔算性感！」 Gaile說。
明知著性感戲服， Gaile都無刻意戒口，埋位時又無要求攝影師借位遮醜，搞到腩肉現晒形。
「其實現場都有工作人員睇唔過眼，同 Gaile講擺過位就吓拍得佢瘦啲，不過佢因為廣東話講得唔好，成日 NG，覺得阻住劇組收工，所以就話『 I don't care！』當無事發生！」一名劇組人員透露。
螞蟻纏身
近年無拖拍，閒時 keep住做運動的周秀娜，心口大縮水，不復當年勇，雖然電影入面的衣著打扮不及樂基兒性感，但一樣秀色可餐，其中同 KB（ Kevin Boy李健宏）結尾一場埋身肉搏，單是試位已經俾對方撞到周身瘀，最慘莫過於大家有超親密接觸——被對方舔面，娜姐坦言是入行以來最尷尬的一次。
「都知係劇情需要，但係 KB好似上咗身咁，搞到佢身上嗰啲假血黐到我一身都係，所以拍完覺得勁尷尬。」周秀娜說。
據知《女》片所用的假血漿加入了糖漿營造效果，加上開工期間撞正大熱天時，搞到娜姐成為螞蟻恩物，長期被纏身，痕癢無比，加上拍攝的場地歷史太悠久，老鼠橫行，搞到不用埋位時，尤其開夜班，娜姐連坐都不敢，就是怕自己大意瞓着惹老鼠咬，所以話片酬每一蚊都有血有肉，絕無誇張！
撰文、攝影：娛樂組
|
鍾意就快D Share啦！
|
|
|
