頭戴 cap帽的夏雨一支公現身西貢散步。
探熱針
吹雞拍《溏心》電影版，夏雨「採礦」度橋
相隔十年，《溏心》系列再度回歸，夏雨當年憑着拋妻棄子的 Joe鮑勇奪視帝，今集搖身一變做「奶茶王」正爸，同李司棋繼續夫妻檔鬥戲，雖然今輯唔及前兩輯般可以掀起熱潮，不過夏雨打算食住個勢，密謀搵原班人馬將《溏心風暴》拍成電影。
早前，夏雨一支公現身西貢，行足大半日，全程露出一副「諗樣」，仲一時興起就地「採礦」，唔通係為新搞作攞靈感？
拍電影
台慶劇《溏心風暴 3》強勢回歸，劇中繼續有夏雨、李司棋、關菊英、米雪四大「鐵膽」坐鎮，加上王浩信、岑麗香及黃翠如等新血，繼續玩家族爭產家嘈屋閉內容，不過劇集播了一星期，外間反應沒有預期中般轟動，仍未創造到追劇熱潮。
曾經離開無綫向外闖的夏雨，今次奉召回歸無綫，用「奶茶王」正哥身份為《溏心》系列再續未了情緣，他多次表示對《溏心風暴 3》充滿信心，仲密謀搵晒原班人馬將《溏心風暴》拍成電影。
「夏雨而家係一間影視娛樂製作公司嘅總監，佢對電影仲好有抱負㗎，之前已經聽過佢講話想將《溏心風暴》拍成電影，最近終於有行動，見佢搞劇本，搵演員，搵投資者樣樣都親力親為，仲話一定要李司棋喺電影入面做番佢老婆，關姐、米雪兩個鐵腳仲話一定撐佢，佢而家已經傾得七七八八。」一名幕後工作人員透露。本刊亦就《溏心》系列開拍電影向夏雨求證，「而家未有準備嘅時間，不過一路進行緊，資金就唔使擔心，我哋公司自己都可以開，只不過可能會有外來的資金一齊做！」
「採礦」度橋
瓣數多多的夏雨，近排除了忙着劇集宣傳，仲要拍戲，搞電影，日前難得有空閒，他揸車去西貢附近散步，戴着 cap帽的他，一支公百無聊賴在街上兜了幾個圈，經過餐廳門口，拎起餐牌研究一番，揀唔啱心水，又行入士多買嘢飲解渴，現場所見夏雨全程邊行邊露出一副「諗樣」，其間仲在大街大巷上忽然「採礦」徒手撩鼻屎，但似乎唔多合衞生，行到攰夏雨就去麥記買套餐外賣，再去攞車返屋企醫肚。
態度轉變
當年，夏雨憑着《溏心風暴 2》坐上視帝寶座，但後來由於人工奀過市價一半，最後決定離開無綫投向王維基 HKTV，事隔五年夏雨重返無綫拍《溏心風暴 3》，雖然一樣要密集式開工，但夏雨冇怨言之外，更大讚劇本好。
「夏雨今次返嚟拍呢套劇雖然比當年已經加咗好多人工，但當然都唔係佢嘅市價啦，不過話晒都有情意結，而且佢都期待咗好耐同啲舊拍檔合作，今次佢真係有讚冇彈！」夏雨身邊人說。
不滿輸俾陳豪
入行四十多年的夏雨， 74年加入無綫，由於轉數快、口才好，一直受大台重用。七、八十年代於《倚天屠龍記》、《民間傳奇》等劇已經擔正，後來於《歡樂今宵》內扮演諧星「阿煩」，以秒速一秒講六個字，更是深入民心，其後夏雨移民加拿大，又轉戰台灣發展，令事業沉寂一時。
07年夏雨拍《溏心風暴》成為經典，可惜視帝一獎輸了給陳豪，令他相當不滿，到 08年第二輯《溏心風暴之家好月圓》終於一嘗視帝滋味，直至 12年離巢無綫，夏雨直斥無綫人工低，連新人都賺得仲多，並過檔港視，與鮑起靜合拍《歲月樓情》後，一直係自由身的夏雨，去年再度回巢無綫，接拍《溏心 3》。
撰文、攝影：娛樂組
|
鍾意就快D Share啦！
|
|
|
