貪靚 Do姐最怕猛烈陽光，出街一定要戴口罩。
探熱針
揭護膚兩大秘密 60歲 Do姐見光死
《 Do姐再 shopping》今次 Do姐繼續率領農夫、翠如 BB加埋馬明、蕭正楠，遊走日本、意大利、丹麥歎世界，只要 Do姐一拍住農夫，分分鐘都有笑點，難怪贏盡口碑同收視。
一向形象霸氣的 Do姐，唔只做節目時尖酸刻薄，現實生活中，出名貪靚的 Do姐對護膚一樣要求高。上星期她單拖現身銅鑼灣，短短十五分鐘， Do姐換咗兩個口罩，揸車時仲要戴上白手套，慎防肌膚接觸紫外線同細菌，夠晒姿整，一眾有「公主病」的港女睇嚟都要行埋一邊喇！
俾農夫任窒唔嬲
三個月前， Do姐俾大台擺上枱，在港姐決賽中一人投兩票扭轉整晚賽果。事後 Do姐捱轟，被網友指「造馬」兼「話晒事」，不過上星期一連十五集的《 Do姐再 shopping》一出街， Do姐馬上由負評變番正評。
獲 Do姐欽點，陸永同 C君今次變做鐵膽，由頭帶到尾，仲反客為主，句句都寸爆 Do姐，勁有節目效果。不過一向專業的 Do姐對住班後生仔女，一啲都唔遜色，年屆六十徒手玩攀石，身手仲敏捷過翠如 BB。之後同農夫鬥瑜伽，跳慣鈣質舞的 Do姐輕易表演拱橋，網友拍爛手掌。
至於一向轉數快的農夫，開口埋口都窒住 Do姐，扮佢跳鈣質舞，寸爆 Do姐年紀大，又笑佢「孤寒」，不過 Do姐都唔弱，下下霸氣反擊。
縮減成本
上一輯《 Do姐去 shopping》， Do姐帶住班嘉賓豪去歐洲豪買豪食，歎靚酒、食魚子醬、貴價海鮮。最終搞到嚴重超支。據知今輯開拍前，上頭下旨控制成本，轉玩大眾化，樣樣都慳。
「上一輯 over budget好嚴重，今次上頭講 cut budget，好明顯佢哋今次去嘅地方都冇上集咁豪咁高檔，玩高卡車、食水果 buffet、行二手市場，呢啲全部有限錢。」一名工作人員透露。
包到冚出街
節目入面， Do姐女王形象深入民心，現實生活的 Do姐一樣有要求。上週五（一日）， Do姐唔使開工，單拖行銅鑼灣。一向貪靚的 Do姐除咗日日做運動， keep住副 body之外，她為了保護肌膚，慎防肌膚同陽光玩遊戲，出街一定要戴囗罩，呢日見佢笠住黑色囗罩，遮住半塊面，剩係見到對眼。
戴手套揸車
短短一段路， Do姐行得好急，怕俾人認出。見她一支箭衝去停車場，上車後 Do姐突然轉 look，換上花花口罩再包埋條頸，而且更怕紫外光曬到她對纖纖玉手，所以揸車時她一定會戴番對白色手套先開車走人，果然夠晒姿整。
「 Do姐對皮膚落咗好多功夫㗎，以前佢做過果酸煥膚，所以佢啲皮膚好嬌嫩，佢會好好保護！同埋皮膚、手同頸嘅紋就最容易出賣年齡，所以 Do姐好小心保養，出街手套、口罩呢兩樣嘢一定唔少得。」
名人怪癖
不少公眾人物，表面樣樣都好公開，但背後亦有不為人知的一面，不乏各種各樣的小怪癖，嚇人一跳。
撰文：娛樂組
攝影：陳亦龍
|
鍾意就快D Share啦！
|
|
|
