熱爆娛樂: 對沖基金吸網友 [壹週刊 - 1448

2017年12月7日星期四

對沖基金吸網友 [壹週刊 - 1448 - 財經] __,M1,

中巴的大筆現金與這塊柴灣地皮，引來基金追擊，可惜無功而回，上一次股東會小股東無錢落袋，惟有將外賣拎走。

中環人語

對沖基金吸網友

話說，有個土炮對沖基金──亞皆老街基金追擊咗中巴一年，出信俾中巴顏氏三姊弟，要佢哋派特別息，或者用公司現金回購，但都打唔入中巴大家姐顏潔齡個心。基金佬軟硬兼施，既出動基金界「小鮮肉」，又用「激將法」，引經據典「人生七十古來稀」，暗寸三姊弟「嗰頭近」，應安排接班人，但都無功而回。

最近，佢哋承住科網熱玩埋 online，整個網站（ UnlockValueCMB.com）出來俾顏氏歎吓。網頁內爆中巴平賣柴灣車廠地皮俾太古，而負責地皮估價嘅人，卻曾經係太古高層，似乎有利益衝突噃！此外，大家姐顏潔齡喺金鐘統一中心開律師樓，個單位都係中巴物業，但年報竟然無申報，小股東完全唔知有呢單潛在關連交易。

網站內有晒基金俾中巴嘅信，以及傳媒報導，不過就無片無動畫，又無喺 facebook宣傳吓，基金想吸引埋網友股民維權，不妨出動番金融界小鮮肉及仙氣女神囉！

領展場新買家姻親蜘蛛網

繼誠哥出售中環中心後，上週又有巨刁，由吳繼煒、吳繼泰昆仲創辦的基滙資本，以二百三十億元買入領展（ 823）的十七個商場，撼低其他對手如黑石資本等，可謂平地一聲雷。

低調嘅吳氏兄弟其實已經到咗第三代，佢哋同名流嘅關係，就好似蜘蛛網咁伸延。 Well，聽住喇，佢哋爸爸吳仲燦，太太是德昌電機（ 179）主席汪穗中的胞姊汪靜宜。吳仲燦的兄弟則分別娶了南聯實業周家的兩位千金，所以其連襟包括利豐（ 494）馮國綸、永泰（ 369）鄭維強同希慎（ 014）利乾。吳家的旗艦建生國際（ 224），亦與田北俊兄弟扯上關係，建生原為製衣廠，由田北俊舅父榮志仁創立，七十年代落入吳家手上，之後轉做地產。吳仲燦九八年以建生國際名義，增持舊同學趙世光的華光航運股份成為大股東，一九九九年去世後，第三代吳繼煒、吳繼泰將華光股份售回趙家。

第三代吳繼泰的外母童王培蒂，是香港紗廠王統元的姪女，有「雪褸女王」的稱號，她亦是馬時亨妻子王培琪的堂家姐。其實吳家第一代吳祥川，已經織起咗人脈網絡。吳祥川一九一六年於緬甸出世，長大後回國曾在南京金陵大學讀書，其後重返緬甸做過米業、日本輪胎代理和布廠。五三年來港，做過機械工程、航運同紡織，曾入股陳智思家族的泰國盤谷銀行同亞洲金融，亦是日本最大證券行之一野村國際香港分公司的創辦人之一。

第三代吳繼煒、吳繼泰，同樣在美國出生，分別於史丹福及布朗大學畢業，現報住柯士甸山道及大潭道龜背灣獨立屋。過往兩兄弟打骰的基滙資本，曾以七十二億元買入尖沙咀洲際酒店，以及將長和於廣西一個商場轉手賣給領展賺十五億人民幣，即係曾經同領展交過手。佢哋會點樣處理領展商場，好多人都住！

基滙資本主要在美國和內地發展，為港人熟悉的交易是以七十二億元買入洲際酒店及向長和購入廣西一個商場轉售給領展。

吳繼煒在專訪中提到自己想做創一代，不想做富二代，故自行創立基滙資本。

吳繼煒報住的龜背灣獨立屋是歌手王菲的舊居，三年前以近一億七千萬元買入。

同鄉會變 Club型晒

上週二，香港中山良都會在六國酒店舉行成立慶典，聽個名大家未必知這個會做乜，其實良都屬於中山南區，這樣一說就明晒啦，咪即係同鄉會囉。這個會的英文名是 Hong Kong Zhongshan Southern Club，非一般用開嘅「 Association」。聽到個 Club字即刻型晒，無他，創會會長係先施主席及行政總裁馬景煊，致力大共融，唔改個型名，容乜易清一色變了「前輩俱樂部」。

馬景煊仲話：「同鄉會予人成熟感，我哋係中山人，對家鄉有一份熱情，同時想為年輕人多做點事，招攬中山籍年輕移民，及五湖四海人士。」所以常務副會長，就由永安百貨後人郭永義呢個後生仔來擔任，不過小宗都是對同場呢位打扮到靚靚嘅馬景煊太太，情有獨鍾。

馬景煊（右一）搵埋疏堂表弟郭永義入會。（受訪者提供圖片）

身穿 Johanna Ortiz品牌的馬景煊太太 Vera（左）當然嚟撐老公，旁為先施百貨後人馬天惠。（受訪者提供圖片）

咖啡女王謀 8仔上市

「車位天后」廖湯慧靄一門有三傑，自己嗰檔物業投資公司紀惠集團，勁多磚頭長線收租，保守估計過百億走唔甩了，佢個仔廖偉麟喺紀惠學師完畢，自立門戶搞「正八集團」，成為新一代商廈投資者，至於長女廖偉芬則完全係另一瓣數，有建築師唔做，○三年創辦連鎖咖啡店 HABITU--，成為「咖啡女王」。

佢哋一家三口嘅事業，共通點係冇上市，不過呢個情況相信好快會改變，事關廖偉芬已經搵咗投行幫手搞上市，目標係創業板先，希望明年第一季成事。據聞佢近排頻頻約見芬佬等金融圈人，相信因此飲多更多咖啡咯。

知情人士話，廖偉芬幾年前講過唔恨上市，因為上咗市要以盈利為終極目標，時時刻刻希望點樣增加收入，例如客人坐低慢慢歎咖啡，好難似「澳牛」咁催人哋起身翻枱，所以寧願賺少啲。至於點解依家改變初衷，據聞廖偉芬覺得 HABITU--已成為全港 No.3咖啡店，要揮低前兩間由大財團撐腰嘅巨無霸，再單打獨鬥搞唔掂，所以要借力打力喎。

創興銀行第三代廖偉芬，沒有參與家族生意，亦無加入紀惠集團，與媽媽「車位天后」一樣白手興家，要做「咖啡女王」。

廖偉芬自○三年沙士創立 HABITU--， cafe的設計會配合地區，多設計公司便會特設長枱方便看圖畫圖，在商業區就會多設卡位方便傾生意。

黃建華仙遊　遺大堆收藏品

星期日收到消息，僑福集團主席黃建華喺睡夢中仙遊，享年六十五歲，喺現今醫療科技咁先進下算早走咯。或者大家對黃建華唔多認識，查實佢大有來頭，佢伯爺黃週旋在台灣發跡，但因在當地涉及官非，於是將所有資金轉來香港，在大潭興建豪宅屋苑陽明山莊，到而家依然有部分單位只租不賣。

黃建華接管父業後，有間上市公司幫手打理，幾年前更賣盤，全力歎世界。作為富二代，洋名 George嘅佢醉心收藏品，中西名畫都係佢杯茶，佢係西班牙怪傑達利嘅粉絲，持有四十幅達利真跡，藏量係西班牙以外最多。

唔單止咁，佐治黃更係香港紅酒界最堅收藏家，喺陽明山莊會所嘅地庫，有個佢嘅私人酒窖，要留意唔係普通收藏，係逐個酒莊有專區按年份排列，小宗有幸去過，藏量真係離晒譜咁多，估計總值十億冇走雞。 A