豪語錄
老馬收火，夏雨
夏雨向來老馬有火。
○五年，六十六歲，在無綫三十八年，首次憑《甜孫爺爺》擊敗秦沛、姜大偉、黎耀祥同馬國明首奪最佳男配角，夏雨毫不掩飾說：「頒俾我，是絕對有資格，排隊都應該到我」
○七年《溏心風暴》爆出，夏記被睇高一線成為視帝，最終不敵親生仔（經理人合約）的陳豪，事後勞氣說：「無綫不尊重我，是政策問題""我覺得值得商榷，條氣唔係好順。」
一六年，七十三歲高齡創業，開電影公司，「我覺得我搞（電影）係有我着數嘅地方，我有呢個雄心壯志㗎，我認我唔化！」今年三度回歸無綫拍《溏心風暴 3》，觀眾嫌劇情離地普遍負評，夏雨看透世情說：「全部人有嘢都會放上網，係咪要網上同人嗌交？我嘅能力又係咪嗌得贏一啲唔同意見嘅人？」
夏雨口硬說自己「唔化」，實質心態已漸有改變，畢竟今年已經七十四歲，仲要勞氣到幾時？
拆解負評
老一輩的人講個信字，監製劉家豪、梅小青回歸無綫開劇，夏雨未睇劇本，已答應埋位。「大家互相信任，等於劉家豪都無要求我返去試鏡。以往咁好戰績，幕前又已經合作咁耐，佢唔搵我都爭取返嚟拍。」
我家陳太是無綫劇集鐵粉，《溏心》第一輯已經捧場，睇一輯、鬧一輯，睇到《溏心 3》鐵粉同不少觀眾一樣嫌劇情根本不能夠同第一、二輯相提並論。「風格上係有啲不同，如果太似《溏心》一、二，大家又會投訴，換一個風格未嘗唔好，老實講，一齣戲拍完出嚟究竟好定壞，邊個事前會知？我拍咁多部電影，部部都希望票房過億，但有幾多部都要等開盅結果至會知，我哋都盡晒力，都無嘢可以再做！」
夏雨極力賣花讚花香，指《溏心》賣誇張，《溏心 2》賣悔，來到第三輯是「有恩必報」，同今時今日香港實況，處處你爭我鬥、爾虞我詐有好大出入，堅離地。「你話離地，即是而家好少人做得到，我都承認好少人做得到，但唔代表無這種人。」你自己呢，係咪有恩必報？夏雨的答案透露了他真正的睇法。「受人恩惠會記得好清楚，但我唔敢講有四十六億時會攞晒出嚟，我都唔敢咁講，但我會報。」
部部都希望票房過億，但有幾多部都要等開盅結果至會知。
局部收火
《溏心》系列拍足十年，時代不同，這一輯哪管對白潮語又押韻，水蛇春咁長背死人，觀眾簡單地只有好與差，明顯這一次負評佔大比數，甚至要求無綫腰斬，平日執着至極的夏雨，忽然看透世情。「我諗無一個作品係百分百人都鍾意，梗有人有意見，但係大家都知道，就算最好都不外如是，多一點半點收視，就係咁樣，你講到意見我就敢睇，我都講，有啲意見我係唔聽，嬲嘅，但而家個媒體同十年前已經唔同，全部人都會放上網，係咪要網上同人嗌交？我嘅能力又係咪可以拗得贏一啲唔同意見嘅人呢？我覺得呢啲都唔係我要做嘅嘢。」
係咪要網上同人嗌交？我嘅能力又係咪可以拗得贏一啲唔同意見嘅人呢？
依然唔化
老馬收火屬局部性質，對於他最拿手的演戲範疇依然執着到一個點，這天夏雨舉例說明。「編劇一大班人日日嘔心瀝血度劇本、人物性格出來，但呢個世界沒有最好，只有更好，我唔忽略佢哋嘅創作，但唔好忽略我哋幾十年喺演藝裡面嘅創作，我都有自己一套見解，成套戲最後結局我昏迷咗好耐，醒番見番我嘅恩公（李國麟），第一句講咗句『老友記』就醒番，我話唔得，全套戲就係因為要報恩俾恩公，搞咗四十集出來，昏迷咗好多集，到我醒番第一句說話一定要講『恩公』，我堅持，結果採納咗。最後一句堅持嚟做乜？搞到編劇唔開心，監製又難做，導演又唔知點拍，咪就係唔化囉！」
無綫禁用溏心
一二年拍完《回到三國》，夏雨再度離開無綫，在東南亞拍劇之餘，又當上製作人投資拍電影，等埋位影相時，夏雨透露最近投資的鬼片慘淡收場，但無阻他繼續開戲，尤其是籌備得如火如荼的《溏心風暴》電影版。「其實都係完成自己一個夢想，無錢拍唔到大製作，請唔到大卡士，戲院又唔 buy你，大陸又入唔到，我都係香港影視養大我，都希望可以做到啲嘢，但係太難，我哋有新意念，有誠意去拍，但要不斷喺小製作衝出黑暗，邊有咁容易，繼續努力
「其實（溏心）已經出咗兩個故事，大家開過會覺得唔夠理想，所以而家又重新搞過個故事，我而家突然咁諗，尋日播到第六集，點樣同《溏心》切割，又令到大家都知道係《溏心》一班演員，我哋唔可以用《溏心》嚟宣傳，唔可以話俾人知呢個係《溏心風暴》電影版，同埋我都唔想，好似你今日都識講，第三輯又老土，第二輯又保守，諗緊係咪應該用一班咁優秀嘅演員做新嘢，喺度思考緊！」
但要不斷喺小製作衝出黑暗，邊有咁容易，繼續努力
退休 no way
劇集出街，夏雨訪問排到密麻麻，幾番周旋，先安排到時間做訪問，由度期、預備服飾全部由夏雨一手包辦，很難想像眼前的奶茶王已經七十四歲，直截了當問有想過退休嗎？夏雨斬釘截鐵說：「無！我退休原因只會因為身體唔得，因為我冷眼旁觀睇一啲前輩演員，佢哋有啲本來身體狀況都好好，對白好清晰、節奏掌握得好，可能一場大病就成個人衰退，呢啲唔係我能夠控制，但我覺得自己仲應付得到，仲有心有力應付到咁緊張嘅工作，我唔會成為拍攝負累，做咩要退休？」
豁達爸爸
夏雨對自己的事業幾十年來如一的執着，對住三個仔女，他的豁達卻未必是當今父母能夠做得到。
大仔黃奕晨誓要入行，夏雨萬般不願都沒有半點阻攔，如珠如寶的細女即將大學畢業，計劃好稍後到美國進修，外地就業，和夏雨心中盤算回流香港工作，完全兩碼子的事，無奈但沒有半句怨言：「仔女十八歲就係一個成人，有佢自己人生，我可以灌輸一啲嘢俾佢，但唔可以左右佢嘅人生！」
撰文：陳琳
攝影：黃志明
|
鍾意就快D Share啦！
|
|
|