情陷夜中環
太狠的手
擺明攞景，不寫不快。話說，喺好多年前，我曾經分過一次太狠的手。對方係咩人，好難三言兩語交代，但佢個名叫做 Yoyo，冇錯，即係疊字啲 friend。
你有冇聽過一個人叫 Bobo、 Coco或者 Momo，而佢哋係會有常識學識知識是但一樣？我冇聽過，除咗 Coco Chanel。
什麼時候你會分一次太狠的手？對方其實好冇見識，但佢又唔覺得自己好冇見識，仲要話其實你識嘅嘢唔夠大眾化先會覺得佢冇見識；又或者，其實佢好重疑心，但佢又話呢啲只係關心，而絕對唔係多心，總之就係佢冇問題，卻反而認為，你覺得佢有問題，其實係因為你有問題，而你嘅問題係，「你根本唔夠愛佢。」
長此下去，你終於忍無可忍，寧願搞基都唔想同佢浪費時間，於是便跟她狠狠的分一次手。狠的定義是，連一點舊都不念，一點情都不顧，一點餘地都不留，靜靜的在她耳邊說聲 you are really pathetic，然後冷冷的撇下她獨個兒在那條亞歷山大大廈的玻璃天橋放聲嚎哭，任由途人對他評頭品足。落到的士站，雖然天文台說當天的空氣污染水平屬於偏高，但你突然覺得那刻的空氣特別清新，因為那是久違了的自由空氣。
過了一個月， Yoyo短訊不斷，她說她會改；過了三個月， Yoyo喺面書 post嘢，用啲完全冇文法可言嘅英文話自己好傻好天真， I feel hard to believe I waste time on someone like him。點呀，你女人嚟㗎喎，點 feel hard呀，我見你啲外語講得咁靈光就真係 cannot feel hard喇。
然而，一年後， Yoyo竟然邀請我去她的生日會，仲要喺我未覆佢 message之前再加多句：唔使驚，我對你冇嘢㗎喇， we are still friend right？雖然英文仍然沒有進步，但心胸倒真是寬廣了不少；人哋講到咁，我又冇理由咁小家話唔得閒。起初我真係以為 we are still friend咁簡單，但佢話俾我聽佢個生日會係喺 Amber搞嘅時候，我就九成估到佢想點。
果然。「喂 Marcus，咁遲㗎，全世界等你呀，介紹你識先，我男朋友 Francoise。」又唔係我生日，全世界等緊我？明白，要等嘅，原來就係我同佢男朋友握手呢一幕。「你好 Marcus，聽講你都係做金融呢行。」其實我真係唔會形容自己係「金融呢行」，不過是但啦；佢言下之意，即係佢做金融啦。講真，我第一個反應係，捨得幫女朋友喺呢度搞生日會，應該真係唔小嘢，雖然佢個樣一啲都唔似。「 Francoise你好，你 exactly係做？」有啲人做大眾財務都話自己搞金融，所以我都係想搞清楚啫。
Francoise從褲袋裡拿出一張卡片，早有準備得太着痕跡。喂，係直接由褲袋攞出嚟喎，冇卡片套，冇卡片盒，仲要係一千零一張，唔係一疊咁攞出嚟，即係一早袋定啦。我看一看公司名字，再看看他的職銜，諗嚟諗去都唔明點解佢話自己做金融，明明就是一個跟金融風馬牛不相及的行業。
「你呢間公司係做邊類型嘅金融？」我實在忍不住問。 Francoise突然露出一個不尋常的笑容，說：「我幫『醫生』打工。」聽他這樣一說，真相大白，心裡非常後悔跟他握了這個手，因為我生平最討厭就是他這種人。那一個年頭，是細價股其中一個高峰期，甚至有人說半個中環都是由「醫管局」和「金管局」掌控的。這裡的醫管局和金管局所指的，就是曹醫生派系和另一金字頭集團。
中環不是一個黑暗的地方，但內裡窩藏了很多見不得光的人。他們遍布在不同的所謂商會甚至是慈善團體，例如由曹醫生擔任副主席的仁愛堂、東華三院、公益金、保良局，為的不是結識有錢人，而是巴結生意做得不錯卻又不懂量力而為的人。「生意幾好喎，有冇興趣搞上市？」我？邊得呀，盈利差好遠先夠資格喎。「得啦，我哋幫你搞掂。」你哋？「我哋有好多間公司，每間射幾張單俾你已經夠晒數啦。」之但係，聽講上市費用都要成千幾二千萬，我邊有咁多錢呀。「我哋幫你俾，上到市之後你用股份還又得，現金還亦冇問題。」咁如果上唔到市呢？上唔到市，所有錢當然要連本帶利還，還唔到食埋你間公司。老掉牙的上市黨玩法，如果《警訊》有得睇，可能有好多無辜嘅生意人唔使死。
除咗生意人，受害者當然仲有小股民。玩具大王話佢個女因為康健單嘢喊咗兩次，但冇解釋點解喊。有一對夫婦，儲咗十年錢，有幾十萬，全部買晒康健，今日血本無歸。這對夫婦求助無門，惟有寫信給康健主席，即是蔡小姐。信裡說，當初就是因為相信你們公司，今天什麼都沒有了。蔡小姐哭，想幫他們，但 commercially speaking，這隻同情之手一旦伸出去，後果可以很嚴重。
今年的生日， Yoyo選擇了一家尖沙咀的樓上日式放題，跟她那個在電腦城開鋪頭的新男朋友慶祝。從她的面書可見，滿桌都是食物，包括牛肉烏冬和金菇肥牛卷；雖然看不見當年 Amber的米芝蓮和牛，但她笑得比 Amber那一晚更燦爛。
如果身邊有朋友不是安分守己的話，你可以告訴他們，做人其實不用太複雜，只要你是那個世界的人，便做那個世界的事，開心便是自然而然的事。當下這刻，埋單計數，我們都寧願做 Yoyo，不當醫生。
|
鍾意就快D Share啦！
|
|
|