【《蘋果》獨家專訪】
【最港電影大獎 黃百鳴系列之1 數威水史】
由《蘋果動新聞》和娛樂版舉辦的「最港電影大獎」現正接受讀者投票，選出心目中的最「港」之選，包括最港電影、最港男、女演員等。本報亦獨家炮製了一系列專訪，邀請資深電影人分享他們在八、九十年代港片黃金歲月時的趣事，頭炮便請來新藝城創辦人之一黃百鳴。他大爆原來周潤發演《英雄本色》的Mark哥，竟是執三攤！
「最港電影大獎」投票網址http://bit.ly/thekongestfilmawards
黃百鳴早前在私人遊艇出海接受本報專訪，細說當年新藝城年代逸事，最令人津津樂道的角色自然是周潤發在電影《英雄本色》中叼着火柴、戴着墨鏡和手持槍的Mark哥，成為日後不少電影的模仿對象。不過黃百鳴透露「Mark哥」一角，原本屬意林子祥，而發哥只是第三人選。
首選林子祥
《英雄本色》由85年開始籌拍，雖然發哥是無綫當紅小生，但卻是票房毒藥，他主演的《花城》、《傾城之戀》等，統統叫好不叫座，所以當新藝城找吳宇森執導《英雄本色》時，狄龍所演的豪哥角色才是主角，Mark哥其實只是配角。黃百鳴說：「最初Mark哥個角色係搵林子祥，但嗰陣時林子祥喺德寶好忙，推咗我哋，咁我哋就話算啦，用番我哋自己嘅新人啦，就用鄭浩南因鄭浩南個英文名叫Mark，所以叫Mark哥，其實個角色係寫畀鄭浩南，點知連佢都撞期。」
這部戲故事當時是由監製徐克和施南生的工作室開發出來，當時想不到由誰演Mark哥這個角色，最後施南生提議起用周潤發，黃百鳴回想說：「施南生當時話去搵周潤發，因為Mark哥喺戲裏面只係一個配角，套戲係講兄弟情，就係張國榮同狄龍嘅，佢兩個先係主角，所以搵周潤發嘅時候叫佢客串嘅箒，連一套片嘅片酬都畀唔足嘅！」
冇收足片酬
《英雄本色》也是吳宇森的翻身之作，因當時是其人生最低潮，他從台灣回流香港拍戲，當時新藝城也沒有把這部戲當大片做，黃百鳴笑說：「個budget都唔係好高㗎！周潤發收唔足一套片嘅片酬拍《英雄本色》，可能係收半套咁樣啦，但後來周潤發就醒目喇，一拍落嚟，咦！個氣氛同埋嗰個感覺係好正喎，呢套片係好得喎，所以佢就同導演講『喂，你唔好同我計日數，我唔計呀！我可以任拍㗎，即係個錢我就攞咁多嘅箒，但係個期你要攞多啲都唔緊要』，所以後來吳宇森一路加戲畀佢，變咗出到嚟幾乎Mark哥係主角。」
電影86年在香港上映票房約3,400多萬元，即使放於今日亦非常好，當年更是驚人，同時發哥亦憑此片彈起，在亞洲等地為人認識，連日韓也有不少fans，紅足30多年。黃百鳴藉此寄語時下年輕演員：「唔好講做演員，做人都係，都係唔好咁多計較，有陣時你計較得太緊要，未必係着數！」
採訪：陳月媚
攝影：陳俊強
|
鍾意就快D Share啦！
|
|
|