探熱針
洪永城戒女埋身力箍，視后唐詩詠轉軚戀馬國明
無綫頒獎禮塵埃落定，民選大熱唐詩詠奪視后，喊住在台上感謝好友田蕊妮及已離逝多年的媽咪，除有閨密錫住，洪永城近日亦擺明車馬翻兜，戒女埋身外，更出盡招數，隔空拉票撐她做視后。
洪永城出力發功，不過也不及大台夠威力，為令新劇夠賣點，下旨易角安排馬明換陳豪，第三度「復合」做情侶，今次更反高潮，要她轉軚暗戀馬明。
病住慶功
頒獎禮結束，唐詩詠在公司做訪問至凌晨兩點半才離開，在電視城門外跟一班等候多時的粉絲切蛋糕慶祝，之後攰極回家休息。原來好友田蕊妮與黃翠如一早買定外賣，在唐詩詠家等她回來慶祝，夠晒驚喜！
「頒獎禮嗰日已經有少少傷風，加上佢著條裙中門大開，喺出面行紅地氈時已經要吹風，之後喺廠坐足一晚，啲冷氣又勁，完騷後又要做其他訪問，成個人散晒。」身邊人透露。
週一晚，本來一班朋友為她設飯局慶祝，唐詩詠也因病臨時甩底。攞完獎，唐詩詠馬上有新工作安排，無綫以醫生做題材的新劇《白色強人》，由她配馬國明做一對孭重飛。據了解，劇集臨時易角，雙旦繼續是唐詩詠與李佳芯，雙生陳展鵬及陳豪卻臨時被踢出局。
「套劇舊年年尾已經安排好人選，女主角一直都係屬意詩詠同 Ali，當時男主角定咗陳豪加陳展鵬，大家都覺得卡士幾吸引，到今年一月頭，突然話轉男演員，仲要換晒兩個，由馬明配郭晉安，大家覺得有啲怪。」有工作人員說。
新劇要暗戀馬明
據了解，《白》劇還有力捧的何廣沛和張曦雯，馬明與唐詩詠會有感情線：「套劇入面，詩詠暗戀馬明，啱啱同現實相反，而馬明就鍾意 Ali，何廣沛就暗戀詩詠，而郭晉安同張曦雯做一對，聽古仔都覺得有 gimmick，因為詩詠同馬明呢一 pair，大家都鍾意，而家要個女仔反轉頭暗戀馬明，反高潮幾得意。加上公司之前開會講到明，會落足本拍呢套劇，大家都覺得有睇頭。」知情者說。
唐詩詠戲中暗戀馬明，現實生活中，前度洪永城亦戒女埋身，日前，他被發現在將軍澳麥當勞跟朋友食包吹水，之後又被影到單拖在銅鑼灣借衫，跟女性絕緣。發力翻撻，早前終於成功約到唐詩詠食飯。頒獎禮前夕，洪永城突然變回熱情，隔空撐唐詩詠攞獎，關心她的一舉一動，令大家覺得兩人有機復合。
「佢哋分手頭兩個月，一直都冇聯絡，直到詩詠成日俾人追住問係咪有新戀情，壓力爆煲忍唔住喊，佢哋先有番聯絡，洪永城嗰陣時都有約佢食飯，不過詩詠冇應承，上個月，頒獎禮之前，洪永城係咁幫佢拉票，又通過一個 common friend約埋一齊食飯，詩詠先第一次出去，不過佢從來冇諗過復合。」知情者說。
網民叫復合
分手八個月，洪永城出招再次打動這個最佳女朋友，終於令唐詩詠公開大讚他有改變，連網民都被感動為他打氣，叫洪永城向女方求婚。
教做人做戲
分手八個月，前度不斷表示關心，不過唐詩詠最要多謝的反而是閨密田蕊妮，她在台上喊住講：「我要多謝一個人，佢教我做戲、做人，成日聽我呻，又陪我瞓，每次鬧完我之後都話我：『其實你好好㗎！』多謝你田蕊妮小姐！」
據了解，唐詩詠一一年拍《真相》時認識客串幾集的田蕊妮，一四年兩人再合作《造王者》，對足四個月成為好朋友。「詩詠放假嘅節目，好多時係去阿田大埔康樂園屋企食飯，杜汶澤做大廚負責煮嘢食，佢同阿田就係食同吹水，兩個女人好多嘢傾，好多時詩詠會留喺佢屋企過夜傾偈。」知情者說。
唐詩詠性格易鑽牛角尖，又缺乏安全感，她曾經跟朋友說，田蕊妮就如她的人生導師，教她做戲和做人：「詩詠只得一個哥哥，媽咪走咗，佢負責照顧爸爸，好多嘢都放喺心度，乜都擔心，阿田雖然只係大佢四年，但人生經驗豐富，講嘢又有 point。詩詠當咗佢係自己家姐，好多嘢都會問佢意見。」知情者說。
友誼小姐
田蕊妮係圈中近年嘅友誼小姐，除好姊妹唐詩詠外，有不少圈中人都搵她盡訴心中情，好有人緣。
張栢芝
同住在大埔康樂園的張栢芝，圍繞在身邊的一班朋友都是虔誠基督徒，原來跟唔係基督徒的田蕊妮都係好姊妹，早前阿田更力推她設計的手錶，戴上後影相放上 IG。
撰文：娛樂組
攝影：何子洋、蕭敬漁
|
鍾意就快D Share啦！
|
|
|