熱爆娛樂: 當智慧醞釀成醇酒 [壹週刊

2018年2月8日星期四

當智慧醞釀成醇酒 [壹週刊 - 1457] __,M1,

黎瑞恩

豪語錄

當智慧醞釀成醇酒

2002年的 4月，黎瑞恩在紅館開完《夢想成真演唱會》，就宣布收山，進入另一個開始，先為一個階段畫上句號。

2018年 4月，再踏紅館，個唱叫《感恩有你》，給自己展開精彩下半場，就別讓往事成為包袱。

曾經會為眼裡一粒沙動氣：今日當上單親媽，

身懷兩顆胰臟瘤的黎瑞恩，反而安靜心輕。

當智慧醞釀成醇酒，沒有放不下的事情，修補不來的關係，

儘管路途仍有很多個未知或波折， 44歲黎瑞恩也能笑着喝一口。

醒後及時珍惜

還是少奶奶的時候，曾經有人問黎瑞恩，「幾時復出呀？」她答：「復出之日，就係我離婚之時。」看似一語成讖。但其實當時回應，只表明沒有任何事情，動搖她專注家庭的決心。

雖然結局不似預期，但背着愛過、傷過、患胰臟瘤的經歷，她的快樂指數反而有增無減。

只因前年發現身體出毛病，繼而在超市突然抽搐暈倒。她說昏前一刻，像看到一道門慢慢關上，與世隔絕。醒後，她開始思考：人不會知道自己何時離開；生命可以好短暫等問題！從此改變視野。

「咁大個女未試過暈，天旋地轉嗰啲都未試過，嗰次係第一次，我好記得，企喺度突然間所有嘢好似走晒樣，兩隻眼好似有道門閂埋咁，我仲喺度嗌：『做咩呀、做咩呀！』跟住就暈咗，唔知發生咩事。

醒番，發覺人生如果就咁完結，都唔知咩事。要開始珍惜而家擁有嘅嘢，唔好再成日唔開心，有得玩就玩，有得食就食。

以前會覺得仲有大把時間，遲啲先講又或者今日做唔到，咪聽日、後日做囉，但原來真係今天的事今天做。」

寶麗金小花，有她、劉小慧、湯寶如，廿年情今日依舊密切。

一人有一個夢想！她 18歲的夢想，首選原來不是歌手，而是當警察。當年是少年警訊的活躍分子，後來在歌唱比賽贏了，被音樂人安格斯說服入行。

靠自己爬出黑洞

曾經，走不出離婚創傷，情緒飽受折磨。雖然身邊有好友劉小慧、李國祥等開解，但最後走向正或負，還是靠自己的選擇。想通了，便發現婚姻結束，同時也是尋回自己的好開始。

「我好鍾意買花，結婚前我成日幫襯一間花鋪，後來搬咗冇再去，最近我又幫襯番，個阿姐好耐冇見我，一見我就話好戥我開心，我問點解？佢話我個樣話俾佢知，我係開心咗好多。好多人鍾意徘徊喺唔開心嘅狀態，連當事人都唔知點解。但其實唔開心都係自己承受，旁人唔會見到你咁，陪你一齊唔開心，就算不停勸你唔好咁樣，都係要靠自己行番出嚟，冇人幫到你，俾自己跳番出嚟，抽絲剝繭搵原因好過。」黎瑞恩說。

去年出 HiFi碟試水溫，獲頒銷量大獎，又一證明，任何時候，事業都可以重新開始。

14歲大女凱栭與次子浩儒，是金利來集團的後人，但黎瑞恩自小把他們訓練獨立。「細細個佢哋就要洗衫、煮飯。我份人居安思危，而家好好生活，就有姐姐（傭人）或媽咪照顧，萬一冇嘅時候，唔可以坐喺度。」如今孩子出國留學，用得着。

退後一步理解

其實唔開心都係自己承受，

旁人唔會見到你咁，

陪你一齊唔開心，

要靠自己行番出嚟，

冇人幫到你。

性格率真、路見不平的她，在朋友圈曾經有個花名叫「爆姐」，如今對事對人，會停一停，諗一諗，未爆，藥引自動撲熄。

「以前少少嘢就好易爆炸，同埋我最衰係憤怒得嚟又唔記得嘢，譬如鬧完人，轉頭就冇嘢，會主動打招呼，但可能人哋有嘢，諗諗吓我鬧人都唔應該嘅。

以前有咩事發生，我都會先追究嗰個人，唔會諗解決方法，但而家會先諗點解決件事，唔好嬲住，到搞番掂我已經唔記得嬲人，咁幾好。

對住仔女都係，過往會因為教到勞氣，搞到聲帶穿咗個窿，而家有咩想講，要教就會話：『你過嚟，我想同你傾吓偈。』」

正因如此，曾經有一個農曆新年，她打給前夫原為安排仔女的事上要罵一頓，怎知開口一刻急掟彎，變成「恭喜發財」，說話可以令關係破裂，也可以成為修補。哪管誰對誰錯，有智慧的人總願意主動踏出一步。

忽略了自己

去年女兒一句：「媽咪，你成日為我哋做咁多嘢，你有冇諗過為自己做番啲開心嘅嘢？」一個單純的提問，令黎瑞恩醒覺，最忽略的是自己。

「我性格就係咁，好多嘢都諗人哋先，唔會諗自己，永遠覺得人哋啲嘢重要啲，就算自己有幾忙，都幫人做咗先。我唔係要你報答我，但最後可能得番嚟係一個唔好嘅結果，諗諗吓都有啲心淡。所以個女先會咁講，因為過往我確係忽略自己嘅需要同感受。」

曾經放棄事業，愛得義無反顧。愛過、傷過，今日再見亦是朋友，已經足夠。

做少奶奶日子，湊仔還是喜歡親力親為。親情是直接，付出多少，收穫多少。

下半場歷奇

上半場活在別人要求，如今任務完成，是時候做番自己。復出、開製作公司，她說下半場要歷奇。

「而家只要唔害人，唔係壞事，咩都想試吓。例如去睇韓星演唱會，換轉以前我唔會去，聽唔明，都唔知佢唱乜，而家我會試吓陪阿女睇，發覺又真係幾好睇喎！」

去年開製作公司，頭炮作品是林敏驄演唱會。「開公司係誤打誤撞，當日投資阿驄個演唱會，佢話冇理由主辦單位係黎瑞恩，就係咁，開始感恩製作。」

尋回自己，哪怕已經四張幾，踩番 roller，同班朋友集體回憶。

不是炸彈是提醒

心輕了，哪管身體裡有一個，可能是計時炸彈，但黎瑞恩把它當成提醒，每天活在感恩中。「好記得醫生同我講，話照到我有兩粒嘢，好危險，不過又好彩，咁都發現到，因為個位（胰臟）好難發現，通常有呢種情況嘅人，去到末期至發現到。既然咁好彩，就真係要好好保持身體健康，因為做唔到手術，又冇藥食，靠嘅係自己心情，開心就係良藥。如果成日懷疑自己好嚴重，我覺得好多時係嚇死多過病死。

以前我會感恩，而家事無大小，有飯食，有屋住，有工開，都好值得我感恩。」

十八歲出第一張大碟《我從這裡開始》，但她事業真正的開始，是四十四歲的今天。

空肚做訪問

黎明金句有：空肚食早餐。

黎瑞恩出產：空肚做訪問。

訪問前，她叫同事向傳媒叮囑：「帶個空肚嚟，小恩子為你哋預備好多美食。」

拍攝場地在朋友的豪宅，黎瑞恩帶埋傭人到場，為一班接一班的傳媒，準備好蘿蔔糕、年糕、馬蹄糕同自家餃子，似去拜年多過做訪問，空肚來，飽滿走。

親民冇架子，又總為別人設想，下半場贏回自己的她，貫徹始終的，還有贏民心。