現年38歲嘅小雪（原名蔡雪敏）肓有一子一女，經過多年尋尋覓覓，15年三度出嫁，同年輕四歲嘅韓籍老公Robin Cheung再組家庭，去年12月底更於韓國補辦婚宴，當日小雪著上韓式結婚服，以韓文宣讀誓言，場面感人。
小雪趁喺澳洲升學嘅一對子女有長假期，日前攜同佢哋返港度假兼探望家人及朋友，當中包括當年同佢同一間唱片公司嘅漢洋，兩人仲相約到卡拉OK，重唱當年經典hit爆K場嘅合唱歌《其實我介意》。睇返自己當年個樣，小雪不禁大笑，指自己似村姑，又笑漢洋嘅髮型太搞笑。
漢洋就憶述當年跟小雪合唱出現一波幾折，笑指：「佢當年係公司最紅，度佢嘅期好難！」在旁嘅小雪即時否認，仲話自己只係平民百姓。不過，漢洋就爆二人合唱嘅《其實我介意》，呢個版本其實係小雪嘅試唱版，因為她根本冇時間錄音，最後唯有用試唱版推出。小雪又被漢洋爆當年經常「跳掣」，有時會發脾氣，小雪亦承認當時年紀細，責任心冇咁重：「嗰時只係覺得打份工，甚至唔當自己係一個歌手，只係覺得有啲簡單嘅嘢點解做咁耐，做咗阿媽諗法當然唔同晒，有人同我講番我以前做嘅嘢，我都唔信自己會咁做。」不過，小雪慶幸當年大家都知道佢冇心，如果唔係身邊就冇咁多舊朋友。
至於，當年為愛情放棄事業，小雪表示冇後悔，亦不會再憎恨任何人：「如果冇以前嗰兩個人（兩個前夫）我可能唔會成長得咁快，我o依家教仔女都係，唔好去埋怨，好似去一間人人話好味嘅餐廳食飯，最後覺得唔好味就下餐去第二度食過，因為有得食已經好幸福。」小雪話佢最開心係一對子女冇因為親生爸爸唔喺身邊而唔開心，因為佢哋自細已經習慣同小雪一起生活，而且現任老公亦都好疼鍚一對子女。
不過小雪早前喺韓國補行婚禮，用韓文宣誓有啲「甩cut」，佢笑言：「我嗰個年代鍾意日文㗎嘛，我日文就講到，但韓文真係冇乜興趣，次次想學都想瞓覺，不過嚟緊都會學，冇理由第日結婚10年都仲未識講，反而對仔女都講到喇！」
場地提供：RedMR紅人派對
化妝：Heidi Lee @ Heidi-Makeup.com
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent
| 攝影：陳慧安、廖達燊 | | |
| | | |
| | | |
|
鍾意就快D Share啦！
|
|
|