有殯儀靚太之稱的 Kitty近年是非纏身，她激動地回應記者：「我柯潔儀絕對對得住天地良心，佢哋有證據可以從法律途徑追討！」
財經專題
「殯儀靚太」爆終極陰宅風波
「生無一屋藏身，死無葬身之地。」生前死後的香港人，同樣面對着住宅市場被瘋狂炒起，難覓容身一處之苦；不少人眼見骨灰龕位猶如住宅單位般有利可圖，紛紛購買龕花，望大賺一筆。曾經在網台 D100主持《魅影空間》的柯潔儀（ Kitty），有「殯儀靚太」之稱，因分享殯儀奇事及鬼古而深受歡迎，現已絕跡節目。 Kitty契仔袁昭傑（ Jacky）於去年九月向大爆，女方以契媽身份大打人情牌埋身，其一家最終以九十五萬元購入了一批骨灰龕位；可惜見財化水，契仔契媽關係決裂，引發一場陰宅風波。
報導出街後，柯潔儀其他契仔終極現身，其中李毅（ Joe）表示「情節類同」，與本刊分享其借予契媽九十萬元卻無回頭的故事。另一邊廂 Kitty坦白講：「我一生人契咗三十六個契仔契女，如果出兩個敗類我絕對接受。佢哋契我時係有原因，唔通真係只打算契我做媽媽孝順我？」
柯潔儀契親眾多，其一班契哥及契細佬也蜂擁而出，指早於一一年，曾與她有過兩次大型生意合作，但無疾而終，未能取回本金，涉及金額超過四百萬。女方則稱早已與對方協商，把該筆金錢轉移投資至其他地方，她激動地說：「如果我柯潔儀有做過對唔住人嘅事，我唔介意人哋喺法律上有所行動！」眾人因情上契，卻因骨灰龕位等投資而反面；一場場質疑對罵，於紅磡殯儀街中上演。
契哥救一命
「有一段時間柯潔儀有病，打電話問我借錢去打化療針，我二話不說就借俾佢。唔知係咪嗰支針救咗佢，佢就經常喺人前叫我做大哥。」從事殯儀行業十七年的陳偉城（城哥），現時為紅磡兩間長生店的負責人。年過半百的他，談起契妹柯潔儀名字，臉上仍流露着絲絲痛心，不時脫下眼鏡嘆氣。「○四年我負責開唐福殯儀館，係我一手一腳自己領牌、申請等等。當時佢覺得呢一行唔錯，就開始一齊做。」因 Kitty男友是同行，她又經常到城哥鋪頭吹水打麻雀，於是很快就成為圈中一分子。
回想往事，城哥變得激動。「 Kitty轉數很快，好識講嘢，嗰段時間真係好好朋友至稱兄道弟。」直至○九年女方教授殯儀課程後，其開始提出不少「鴻圖大計」，城哥直言她的心如同「雄了起來」；而首個計劃，是投標經營紅磡市立殯儀館。「一一年時世盛殯儀館嘅經營權就到期，嗰時我哋關係好好，佢叫我哋每人投資一百萬，入標等等嘅程序由佢負責，當時我哋有四個人，加埋另一人及佢本人夾咗六百萬，完全相信佢。」
兩大項目涉資四百萬
集資者包括城哥的中學同學、生意合夥人——盧繼照（繼哥）及其兩名弟弟，「我細佬都係做呢行，佢對我細佬好好，最後仲上埋契做契姊弟，當時我哋對佢確係深信不疑。」繼哥展示當年與柯潔儀所簽的合約，後者是以易法國際有限公司控股人身份簽署。該公司於一二年時改名為香港生前契約有限公司，商業名稱為專業禮儀顧問培訓中心。合約當中寫明：「如以上項目未能中標，將全數退回。」項目最後由省港澳陵園禮儀有限公司中標，但他們四位卻未能如白紙黑字般收回四百萬。「佢話因為投標時所用嘅公司名有啲問題，食環署、政府未能立即退款，佢就一直用好多唔同原因拖拖拖。」
Kitty同年向他們提出另一盤生意，指正與元朗佛教真安寺合作興建骨灰龕位。「佢話真安寺興建緊龕位，有三千個位就快起好，佢就話不如將筆錢（四百萬）轉過去，一齊拍住上賺錢。」女方聲稱再聯同了數人，總共合資了九百萬元，並在合約中訂明：「如上述投資項目因任何理由取消、不能進行，則本金會全數歸還投資者。」
寺院備案 稱絕無合作
真安寺有八十年歷史，位於元朗港頭村內，位置稍為偏僻，需步行十分鐘才到達。記者曾到訪該寺，眼見當中只有四至五幢單層建築物以及一幢雙層樓宇，沒發現任何骨灰龕位；寺院以務農及靜修為主，甚少對外開放，可算是自成一國。記者向屬第四代的主持人，展示有關資料及柯潔儀照片，她略帶驚訝表示從不認識此人，直言合作一事：「根本係子虛烏有！」稱多年來也從沒任何興建骨灰龕位打算。對於有人曾以該寺名義集資一事，主持人氣憤地說：「我完全唔識呢個人，從來無咁嘅計劃！」而寺院當天接獲記者求證後，也即時到元朗警署備案求助，指未曾參與相關計劃。
「我個人涉及嘅金額都也過百萬，因佢成日同我講話投資樓、投資生前契約，一時又叫我借錢俾佢，某程度上嗰時我真係好錫佢，當佢妹妹。」城哥指現時 Kitty已視他如陌路人，而契妹 Kitty今次也有反擊。「我當時入去維修廟宇，只同主持人口頭上商討過興建龕樓，佢只係見過我呢個善信幾面，覺得唔算認識我，又有幾出奇？」 Kitty表示從沒沽名釣譽，說過跟真安寺合作，指該寺只是她想發展的廟宇之一，但因種種原因未能成事。「我哋最終合作唔到，係因為有人耍手段嚇親大師！而佢哋手上無任何真安寺嘅印章同簽名，我一直都無話確實已成事。」被指沒退回全數的 Kitty解釋：「我哋七人識咗九年，九年投資中有利有弊、有得有失，都應該吧？」表明自己具有他們同意轉移投資的證據。她反指：「我教學生教咗咁多年，佢哋偷晒我嘅課程出去教人，唔通我又要數佢？」
「叉燒味」言論
柯潔儀為人敢言，因此儲下一班粉絲，其於今年四月接受本刊專訪時，曾分享處理嘉利大廈大火四十一具屍體的經歷，指對當時殮房傳出的氣味，依然記憶猶新，「就好像燒味、叉燒。但嗰啲係人，覺得好噁心、難頂。」此言論成為了一時的網上熱話，該影片之點擊率更高達二十八萬。但繼哥指她此話誇張失實，「我見到時好不忿，她連觀眾同聽眾都呃埋，嘉利大火當年佢根本未入行！」嘉利大廈火災發生於一九九六年，根據城哥及繼哥所見證， Kitty是於○四年入行。更令兩人動火的是：「我哋行內都知，一般意外身亡嘅遺體，喺政府立場要法醫解剖，要知道遺體喺燒過前時已身亡或係其他原因。解剖後嘅遺體經過雪藏會腐爛，正常係會有少許腐臭味，但絕唔會有叉燒味。」
Kitty聽後大感無辜地指：「我喺永福做學徒時，佢哋嘅唐福都未開，盧繼照細佬更加係我徒弟！我又點會遲過佢哋入行？」她解釋由始至終只是想分享難忘經歷，沒想過帶來如此大回響，「我可以話你知，做殯儀係無廣告賣。」她更保證繼哥及城哥從未見過該場面，「佢哋燒死時身體係扭曲，某啲遺體係未能放落雪櫃，但仍然保持住溫度，嗰種味道唔係雪完就消失，就如叉燒放落雪櫃，再打開時都會有味道。
曾照顧契仔一家兩年
八十後的 Joe，於○八年時參加了一個有關人生的課程，當時 Kitty正正是他的導師。「學員要向佢訴說自己嘅背景如職業、家中有幾多成員等，因為咁我哋就好快建立咗較緊密嘅關係。」 Kitty當時熱情地酬賓款宴，把全班十二名成員全收為契仔契女。「當我事業開始好時，佢就開始搵番我問我近況，話喺荃灣有個骨灰龕位項目，急需錢周轉。」基於以往友好的關係， Joe前後借了九十萬元予女方，但指自己信奉基督教，並不想牽涉在內，他直指：「唔想賺呢啲錢，只望幫契媽渡過一關。」他至今仍未追回全數款項，更指對方曾開一張九十萬元期票，予他於特定時間兌換；但屆時他才得知 Kitty已申請破產，該票已作廢。「佢明知收咗信會破產，一破產就會被凍結所有資產及戶口，但佢都照開張無用支票俾我。」 Kitty現時仍是破產人士，而 Joe直言對她心灰意冷：「用信任去出賣朋友，我無法子，都好難去防避。」
回應契仔一刀又一刀之指責， Kitty大罵道：「如果我真係破產後再開支票，呢啲叫欺詐。張票最後點解兌唔到，係因為佢問題。」 Kitty氣憤地指：「我曾經收留佢一家兩年，就只象徵式收佢每月五千蚊租，提供（住）全包宴，我呢個契媽仲唔算好？」她指對他曾付出的極難數清：「你問吓佢收過我幾多現金，借咗我咁多錢，有無還過一蚊？」
被一眾契親「無限上綱」、斥責沒良心的 Kitty坦言：「佢哋做咗個聯盟委員會去害我，我係絕對知道。我龕位喺禁售前只賣三萬八千蚊一個，人哋賣緊三十八萬，我點無良心？」誰是誰非難看清，只知彼此曾傷及的除了是荷包，更是曾付出的一片真心。
私營骨灰龕場牌照
香港私營骨灰龕場發牌制已於去年十二月開始接受豁免書及牌照申請，原先只有三十間私營龕場，同時符合地契條款和規劃用途，被指能獲發牌。但食物及衞生局推出了兩項新措施：包括豁免合資格私營骨灰龕場營辦者因改變用途補地價，以及毋須提交對附近交通影響的評估報告，被指大大向龕場「鬆章」。截至去年十二月二十九日，已有二十間龕場正分別向地政總署申請土地用途規範化，或向城規會申請規劃許可。
撰文:黃綺敏
攝影:梁正平,關永浩
|
鍾意就快D Share啦！
|
|
|