記者星期一到購物城現場視察，除咗工作人員，人影都冇隻。
八卦陣
購物城得一成鋪頭試業象哥冇有怕
新田邊境購物城開張日由一五年拖到依家，上星期六終於試業，但就只得一成即係大約廿幾間鋪頭營業。唔少市民入到去都呻笨，因為冇嘢買又冇嘢食。
項目牽頭人民建聯立法會議員黃定光早前承認超支三千萬，仲要問朋友撲水，但佢似乎至今都未驚過，話相信之後生意會好好。
黃定光同《壹》仔解釋，因為之前工展會令到好多鋪頭唔夠人手，所以佢哋暫時未開到門，又話其實五成鋪頭已經租出，不過大部分都仲裝修緊，先咁少鋪頭開業，「我希望佢哋唔精裝（修）都簡裝，趕喺歲晚前開業，相信過年生意會好好。」
不過計番條數，得五成嘅出租率，點都唔夠回本。我哋幾個月前訪問過象哥，佢話呢個耗資一億五千萬嘅購物城，如果單靠租金收入，要全部二百幾個鋪位租出，大約營運兩年先可能勉強回到本。
之前《壹》仔踢爆，購物城兩大地主新地（ 16）同恒基（ 12），早喺一五年已經向城規會申請喺購物城地皮起商場，最新計劃想一九年動工。象哥話，發展商俾咗書面同意佢哋，如果城規會批准購物城續期，會肯繼續用一蚊年租「租地」俾象哥。數數手指，如果兩大地產商真係一九年動工，象哥回本機會真係微乎其微。
由民協過檔白鴿黨莫嘉嫻望抹掉以往
法會補選三月十一日先正式投票，贏家仲未有分曉，但最大嘅輸家睇怕非民協莫屬。皆因馮檢基堅持參加民主派初選，唔單只俾網民笑佢「永續參選」、「政壇關愛座」，黨內唔少成員都唔賣賬退黨，當中就包括前任主席莫嘉嫻。
已經轉投民主黨嘅莫嘉嫻，喺主席胡志偉嘅地區辦事處做事，話因為繼續留喺九龍西工作難以擺脫民協影子，所以轉到九龍東。佢話：「希望將以前嘅事抹掉，重新開始。」仲話同樣做地區工作，依家感受到團體合作，有別於過往單打獨鬥。
莫嘉嫻一九九六年大學畢業後，已為民協工作，做過四屆區議員，曾經同基哥拍檔參選過立法會，講到昔日「恩師」，佢話基哥對事情可以非常執着堅持：「無論喺咩環境，人哋點話佢，都會有一份堅持。」
正正因為基哥做事往往堅持到底，所以莫嘉嫻對佢最終唔做 Plan B都覺得愕然：「既然堅持咁耐，何不堅持到底？」但佢最後依然欣賞基哥做咗呢個決定，仲發短訊俾佢叫佢加油。
撰文:巫不言
|
鍾意就快D Share啦！
|
|
|