為老公學整團年菜嘅李亞男功架特別，拎住祖藍送俾佢嘅煎 pan當盾牌擋油，巧趣致。
探熱針
廚房起火煮團年菜互窒 李亞男要王祖藍彈開
踏入狗年新正頭，忙到爆的王祖藍終於收爐抖一抖，陪老婆去拜年，李亞男亦入廚學整幾咪團年菜慰夫。
兩公婆玩煮飯仔，火花四濺，互窒原來都係夫妻情趣。「廚房起火」後，轉過頭兩公婆又回復恩愛，恨生 B的李亞男更祝老公三年抱兩，睇嚟狗年王祖藍要再發力搵奶粉錢。
廚房係祖藍禁地
自去年老婆李亞男突然爆發驚恐症，抽晒筋兼呼吸困難入院，愛妻號的王祖藍決心減產，以時間作為給老婆最好的禮物。老公多咗食住家飯，李亞男亦努力鑽研廚藝。去年中秋她下廚成功，煮出一圍菜式招呼親朋後，今年她決定親手炮製團年飯，讓老公團年食好西。見祖藍成日笑佢多「蝦碌」，李亞男向雲來軒大廚保哥學師整一味「美極蝦碌」俾另一半歎。
估唔到兩公婆在廚房火花四濺，祖藍在旁監工，教老婆跟足大廚方法落鑊，李亞男會大嗌：「好大壓力！」原來平日在家玩煮飯仔，李亞男會下驅趕令，嚴禁祖藍埋身。
她說：「我叫佢千祈唔好入嚟，我要佢彈開。（祖藍：廚房係我禁地。）因為佢太高大威猛，佢好阻定，佢嘅存在會令我好緊張。」呢個時候，祖藍已自動彈開幾步。
快轉數窒老公
「蝦碌」煎製中，祖藍主持人上身：「去到呢個時候，《都市閒情》嘅人一定會講：『依家開始聞到香味！』。」李亞男神回應：「我知你係寸緊我。」
「我係寸緊《都市閒情》，唔香，唔通係臭咩！」祖藍說。
李亞男九秒九反擊，寸祖藍爛 gag：「哈哈，好笑呀！好笑呀！」被祖藍訓練有素，李亞男的轉數竟有光纖速度。
「美極蝦碌」大功告成，但李亞男上碟時聞到一陣燶味，大廚保哥發現原來是她忘了熄火，祖藍不禁失笑：「哈哈，真係蝦蝦大笑。」
祖藍煮嘢老婆硬啃
兩公婆互寸只係生活情趣。錫老婆的祖藍，除送過億豪宅，亦不時買小禮物氹另一半。下廚當日，李亞男手執當盾牌防煎炸油彈的煎 pan，是老公送給她最合心水的禮物。只要有空，祖藍也會為老婆下廚。「我會煮土炮嘢，例如生菜魚肉、芒果布甸等。」老婆對他廚藝有何評價？「佢全部唔食，但又會扮食，其實佢唔鍾意食呢啲。」係愛呀！
煮好餸，呢個時候兩位食神，祖藍旗下的藝人細細粒（陳嘉佳）同林欣彤準時到場，一嘗老闆娘手勢，兼藉勢關心今年公司團拜有幾多現金大抽獎。祖藍派定心丸，話保證有六位數字獎金獎品，每圍都有現金獎拎走。
李亞男忽然說出神句：「祝我老公三年抱兩，心想事成。」
王祖藍：「咁唔該佢哋（細細粒同林欣彤）今年幫公司搵多啲錢，唔搵多啲我點生。」
林欣彤新年求猛男
過去日子患過抑鬱，搞到一度失聲暴瘦的林欣彤，去年逐步康復，歸王祖藍旗下重新投入工作。新正頭佢有兩個願望，首選當然係身體健康。「真係深刻體會冇健康就乜都進行唔到。愈大愈發現，身體係要好好珍惜。」
重捨健康，去年推出新歌，在樂壇重新出發，她感激老闆王祖藍的信任。「感激佢俾我好大自由度，我變咗做指揮，事業就係自己盤生意，上年接咗廣告，做舞台劇同拍劇，今年希望再搵多啲錢，如果唔係點對得住老闆。」林欣彤說。
另一新年願望，如手上「身體健康」揮春一樣，有猛男護身。「呢個時常都想有（拍拖），而家未有，惟有自己強壯啲先，不過緣分唔係你有幾努力，或者係唔係我未夠好，搞到遇唔上真命天子。而係要一切配合 perfect，預備好自己，就會遇上。」
細細粒開價拍寫真
二百磅的細細粒，新年願望唔係瘦身，係出寫真。最近吃少了甜品，自覺輕盈咗（實質冇上磅）的她，動力並非源於搵男友。「成日俾人影到我助手，當係我男友，佢女朋友我都識㗎。早排有同學聚會，見番一班男同學，好多都未結婚，不過飯局後冇一個可以有下文。」
細細粒曾在 ig放過泳衣相，重口味拍得住「女神」欣宜，有生意頭腦的她，決定在新正頭為處女寫真開價。「我露全背係好震撼，因為好少露背做到呢種效果（她用手勢畫上葫蘆形），有啲嘢睇喜好，有啲人鍾意睇稀有珍貴嘅背脊品種。我開價，露全背三千（萬）、見埋股四千（萬），哈哈！」
見細細粒獅子開大口，林欣彤忍唔住插嘴：「呢啲我去頒獎禮做過晒，係唔會有二千三千四千俾我。」新正頭，細細粒妙想天開，大家開心。
撰文：娛樂組 攝影：葉志明、黃志明
場地：裕生海味_iBuddies 鳴謝：雲來軒
王祖藍:髮型： Ted Yeung@ i i Alchemy hair& nail
化妝： K.T. Tsui Styling： Dicky Lee 服裝： Oplus2
李亞男:髮型： Ted Yeung@ i i Alchemy hair& nail
化妝： K.T. Tsui 服裝： kate spade new york 鞋： ETRO
首飾： Atelier Swarovski
林欣彤:髮型： Jim Tse@Hair corner
|
鍾意就快D Share啦！
|
|
|
