胡慧中與何志平婚後育有一女何淦璇（中）。
中環人語
肥平被美國佬「搾」爆
中半山豪宅愛都大廈，停車場有個好「經典」嘅司機候命室，一班富豪司機聚頭有乜做？梗緊講老細啦，候命室傳出何志平喺香港個司機突然「人間蒸發」，嚇死人咩！
原來何志平在紐約，因涉嫌行賄非洲官員被起訴「出事」後不久，聽講即換上另一名「非常口密」的司機，且貌似國安人員，甚少跟一班司機說話。在此敏感時間，就連何志平老婆胡慧中也低調地為老公周旋。
早排外國記者協會特別邀請 Justice Labs主席兼前紐約刑事辯護律師 Robert Precht，分析美國當局對付何志平案的策略，呢位老外話，當局一定會「搾」（ squeeze）何志平，要佢「嘔」多啲有關中方行賄非洲官員細節，仲透露何志平還柙的監獄，乃是囚禁三教九流囚犯之地，肥平呢鋪「爆又死」，「唔爆又死」，身在紐約被美國「鍊住」，老婆胡慧中同阿女喺香港又被中方住。惟有套用其妻胡慧中一句：「師傅話過得到。」來送上祝福，何解？演藝界出身的胡慧中篤信風水命理，其女兒本來就讀於女拔萃，後來因成績追唔上而轉到蘇浙，當時胡慧中跟女拔萃老師求情時說：「 OK，師傅話過得到。」聽得老師眼都凸埋！
超蓮牛肉麵大件夾抵食
上週六，賭王千金何超蓮現身台北「玖五牛肉麵」試味，為她的第一間香港 franchise店做準備，其實超蓮已選址在灣仔駱克道開第一間鋪，上手租客是做高級西餅的 Tony Wong。 Tony Wong搬到元朗 Yoho開分店後，此鋪「吉」咗成半年，現正如火如荼在裝修，門口圍板還寫上「熱烈恭賀台灣人氣老店成功租用此舖」，成為超蓮嘅創業第一炮，附近有室內裝修店鋪，有唔少搬運工人，超蓮在此開「牛肉麵店」都算 make sense，體力勞動嘅食客多，最緊要大件夾抵食，食牛肉先特別「有氣有力」，估計在此區經營平民化的牛肉麵鋪較每件餅賣五、六十蚊的 Tony Wong實際好多。
哽咽局長急換「戲服」出騷
運輸及房屋局局長陳帆去年一上場就探訪劏房家庭，上演一場聞者傷心、聽者流淚嘅「哽咽」騷，就連其香港大學利瑪竇堂同期宿友睇到新聞，都忍唔住爆一句：「正式係 Ricci仔 Drama Club上身。」局長演戲天分在上週六九巴車禍中亦發揮得淋漓盡致，當日傍晚六時出席港鐵傳媒聚會，得悉車禍有五人傷亡時立即中途離場，趕往醫院與高官同僚一字排開表演慰問騷，其時原本穿在裡面的一件樽領冷衫已脫下了，換上另一件簡單上衣，何解？演員都要配上合適戲服，此冷衫樽領部分乃是紅色，十九人死亡，穿紅色衫攞彩咩！
月薪七萬家廚難求
有錢佬經常外出用膳，嘗盡珍饈百味，返到屋企其實最想食家常菜，好似思捷前老細邢李㷧，佢在家中早餐，依然是奶茶、多士、菜遠牛肉公仔麵，晚飯餸菜只是梅菜蒸魚骹或肉餅之類，可能富豪發達後，依然緬懷創業之時，踎茶餐廳或大牌檔之早餐及碟頭飯，正所謂百般滋味在心頭。然而市場上家廚難求，事關有料的大廚一旦被包起私有化，頓時跟市場脫節退步，將來想出山再撈，已冇乜市場價值，最多只係話曾做過××家廚，聽一名大口名廚講，有重慶李嘉誠之稱嘅張松橋，出價月薪七萬都請唔到家廚呀！
撰文:宗菁華
|
鍾意就快D Share啦！
|
|
|
