【《蘋果》專訪】
【閃耀人生女人心 袁詠儀系列之3 爛玩老公】
袁詠儀（靚靚）與張智霖（Chilam）結婚17年，至今鏡頭前後依然恩愛，但原來Chilam曾經相當爛玩，不時相約好友飯敍，更試過一星期打足七日牌。靚靚痛憶當年產下囝囝魔童後，出現產後抑鬱，很容易發脾氣，老公亦不抽時間陪她坐月，兩人更有離婚的念頭。
採訪：陳月媚
張智霖性格樂天貪玩，最喜歡約郭富城和沈嘉偉等好朋友吃火鍋、篤波及打麻雀，袁詠儀直言與Chilam拍拖時，經常因為Chilam出去玩這個問題發生爭吵，而兩夫妻關係跌到冰點是因Chilam曾一星期打足七日牌，靚靚當然覺得老公好過份，又怎會不吵架。
靚靚指經常給老公「食住」，因其性格衝動火爆，相反Chilam的EQ和IQ都比她高，所以每次兩人有爭執，她一定說不過老公，好像她坐月時要老公抽多些時間陪她，Chilam卻想出去玩，兩人就會吵起來，靚靚表示：「我坐月時，叫佢陪吓我啦，佢就會話『喂你坐月之嘛！點陪你呀！大家都坐喺度呀？』我同佢講唔好出去，我話鎖門，佢跟住就成晚黑面坐喺度，見到佢咁我就會算數，叫佢快啲出去就算，咁佢就變返好開心，真係好低能！」經過如此多年，靚靚已經放棄干涉老公同城城這幫朋友去玩，總之不是去「滾」就算了。
被嘭門聲一吓點醒
在靚靚生完魔童之後，出現了產後抑鬱，經常覺得老公沒有陪住自己，所以她很容易亂發脾氣，Chilam都受不了，他們更已經有心理準備要離婚。當時如果不是靚靚作出補救，相信兩人已經分開了，她表示：「我生完仔冇幾耐，我諗係荷爾蒙出問題，有少少產後抑鬱，我會將老公講嘅說話、行為放大。我睇到一啲我唔順眼嘅嘢，就會將佢放大，好恐怖，佢由最初忍、忍、忍，忍到佢都忍唔到，佢都爆㗎！嗰個係幾危險嘅事嚟㗎，我諗可能人就係咁怪，一個人對你忍，你一路覺得佢喺度冇嘢，當佢一反抗，嘭門出去之後，你就會醒！」
一直以來，Chilam都會好忍讓老婆，所以靚靚從未見過老公發如此大脾氣：「佢真係嘭門呀！我哋成家人都喺晒度，佢嘭門，我諗佢嘭嗰一吓點醒咗我！因為我冇見過佢呢個行為，知道自己出事，我同自己講『嘩！袁詠儀你再係咁呢就出事㗎喇！佢已經忍唔到，你係咪就要係咁。」但可能嗰陣時我心態就係，你退一步咩，我就踏前一步；你退一步咩，我就踏前一步！個個都喺度就我，危險㗎，我哋有坐低傾番，我都覺得其實自己要有啲嘢放鬆，有啲嘢要去諗，呢段時間維持至少半年，總算捱過，有驚無險。」
哽咽唔畀老公死先
靚靚曾經在《金枝玉葉2》內，問過哥哥（張國榮）這句對白：「你想我死先定你死先？」在現實生活中，張智霖都曾經問過靚靚類似問題，記者問靚靚如何回答？靚靚未開口已經眼泛淚光：「因為我都幾依賴佢，佢好多時會話『喂！我死咗咁你點呀？』所以我同佢講，你唔好死住！呢一刻我覺得如果佢唔喺度……我諗我生活唔到！」講完靚靚已經眼濕濕哽咽，說不下去了！
化妝：Kerry wong
髮型：Sam Pan@Muse Hair
場地提供：好酒好蔡
|
鍾意就快D Share啦！
|
|
|
