毫無疑問，無綫深夜時段重播嘅劇集，一定好睇過黃金時段依家播緊嗰啲，好似啱啱播完嘅《我本善良》，當時仲未變愛國瘟嘅溫兆倫拍住永遠都咁型咁靚嘅邵美琪，仲有老戲骨曾江羅樂林，好好睇。
嚟緊，今晚會一口氣播《不懂撒嬌的女人》——一晚播五集，播完之後呢？又返番去上世紀八十年代，今次係1986年嘅《流氓大亨》。卡士有鄭裕玲、萬梓良、吳啟華、周海媚、劉嘉玲。主題曲同插曲，有請冗小鳳姐——主題曲《城市足印》可能大家冇乜印象，但片尾曲《婚紗背後》應該聽過下，嗰一幕，就係萬梓良同鄭裕玲教堂行禮，婚紗背後嘅，係黯然神傷嘅劉嘉玲……但原來呢幕咁揪心嘅戲，並非先有劇情再寫歌，而係調番轉。當年韋家輝係聽完一早錄好嘅《婚紗背後》，深受啟發而寫出教堂呢場戲。這是後話。
依家要講嘅，係鄭裕玲同劉嘉玲拍《流氓大亨》一段恩怨。呢段恩怨，嚴格嚟講係「都市傳聞」。嗰陣盛傳拍攝期間劉嘉玲遲到，令一向準時嘅鄭裕玲大動肝火，更傳出鄭裕玲兜口兜面鬧嘉玲遲到。估唔到要等到今時今日，鄭裕玲邀請嘉玲上佢個電台節目《口水花多過浪花》做訪問，先令事情水落石出！
呢單嘢，係鄭裕玲講起先嘅：「咁你知啦，拍電視劇係好辛苦嘅。嗰朝早我記得我係拍法庭門嘅，咁就有人遲到喎（語氣嚴厲）咁我就，個心又『炆』啦，咁我就『炆底』，我就問嘉玲，嘉玲話唔係佢遲到。咁總之我就有話咗一個人嘅：『點解你遲到？』（扮番鬧人嗰個表情）咁somehow就傳咗出去，唔知點解，一路傳傳傳就話我話劉嘉玲。
「前幾年《康熙來了》訪問劉嘉玲，仲喺度問呢件事。」鄭裕玲開始激動，一直默不作聲嘅嘉玲終於出手，真係出手捉住鄭裕玲隻手，話喇：「嗰個呢，我哋唔係拍緊同一套（場）戲，你係同周海媚一齊拍嘅。」鄭裕玲嚇咗一跳，「吓？」一聲彈開咗少少。「你根本唔係周海媚……」已經忍唔住爆笑，嘉玲一貫冷靜繼續解釋：「係真係，我記得周海媚好似遲到嘅，你係早咗兩個鐘，佢嗰日遲到咗好耐。」鄭裕玲聞言即說：「即係我係唔啱，我係早咗…」嘉玲馬上再輕拍佢隻手安慰：「你係準時…」
咁跟住點呢？嘉玲嘅版本係嘅，佢話：「你（指鄭裕玲）當時行埋去，指住佢話，『你做乜遲到呀？嗱，依家呢，我就等咗你兩個鐘，我依家出去飲茶喇，你慢慢喺度化妝』」嘉玲講講下都忍唔住笑，鄭裕玲爆咗句：「係喇！」
最港電影大獎投票網址
http://bit.ly/thekongestfilmawards
更多韓流，喺晒《娛果》
http://fb.com/appledailyent
|
鍾意就快D Share啦！
|
|
|
