【新增影片】
毛記葵涌（1716）今日上市，專家Dickson被委以重任，成為毛記發言人，不但代表上台發言，敲鑼，更加接受記者訪問，而專家Dickson全程妙問膠答。
被問到預期股價走勢有冇驚喜，「100毛上到市都係一個驚喜，所以我估個走勢都應該驚喜。」
被問對公司前景有冇信心，「嘩！雖然我個名目係『財經投資專家』，但其實我係一個『愛情財經投資專家』，我只能夠講，我自己希望，我自己愛情指數會上升。」
被問公司上市後有何變化，「我估雪櫃發霉食物會清理咗佢。」
被問公司上市後會否爭取加人工，「我每一日都爭取，最好日日加畀我。」
被問老細會否對他予以獎勵，「我相信係會嘅，但我希望唔會係獎兩巴掌。」
被問會否想公司派予股份，「公司其實有架，佢哋派咗兩股畀我，就係東方昇嗰兩股。你哋有冇睇東方昇特異功能救香港，嚟緊會有門票畀我哋，嚟緊加場呀4月3號賣飛。」
被問毛記多人抽原因，「好多人抽我哋隻新股咩？哦，點解會咁多人抽，可能係因為100毛個100好意頭。」
被問今日有咩慶祝活動，「我諗就係返工。」
被問嚟緊會唔會再搞多啲大型Show，「我相信會、我相信會。」
被問到公司業績前景，「公司有業績架咩，我自己估計，應該係ok。我諗呢啲你真係問返啲投資專家，我只係一個『愛情財經投資專家』，仲要係一個失敗嘅。」
被問未來會否與中資公司合作拍廣告，「你係咪講中立嘅資金？（內地嘅資金）我諗應該唔會。」
被問未來會否與信用卡推出大型廣告，「呢樣我真係唔知，我喺公司係斟吓水，幫人整吓電腦。」
作為員工，覺得老細今日心情點，「一貫作風，都係黑面，冇咩特別。」
最後終於有記者忍唔住問，「你哋公司會唔會有其他人，講到啲實際啲嘅嘢？」Dickson指，「我諗有嘅，我哋公司都OK嘅。」
蘋果財經，關心你飯碗
http://fb.com/appledailyatm
|
鍾意就快D Share啦！
|
|
|
