上下一心 熱情澎湃《紅海行動》直衝45億香港慶功
英皇電影《紅海行動》勢如破竹，至今全球票房邁向45億港元，台前幕後振奮不已！繼早前北京慶功宴後，導演林超賢昨晚偕同台前幕後再於香港慶功，獲老闆楊受成親自到場鼓勵劇組，恭喜林導成為全球最賣座華語電影香港導演，並頒贈大利是給林導及監製梁鳳英。抽獎期間楊受成徇眾要求「加碼」，又即場大派利是，獎金高達50萬港元，全場起哄！
《紅》片在內地上映至今39日，反應熱烈，錄得約36億人民幣票房，成為內地春節檔史上票房總冠軍，而本港亦昂然進入上映第4周，港澳區票房邁向千萬大關，可喜可賀！由於《紅》片全球票房邁向45億港元，林導正式宣布揮低《美人魚》的周星馳，成為「全球最賣座華語電影香港導演」，風頭一時無兩。昨晚慶功宴上，英皇集團老闆楊受成、博納影業老闆于冬、演員任達華、蔣璐霞、王雨甜、麥亨利等紛紛亮相。楊受成及于冬負責主持抽獎「派錢」，又向團隊大派利是，獎金高達50萬港元。
分紅加片酬
對於《紅》片大賣，楊受成受訪時大表高興。問他是否「賺好多」？他說：「唔係，同地產、股票差好遠，但身為出品人同老闆，見到套戲叫好叫座，自己都好開心。（咁好成績，考慮開拍前傳？）唔知，要睇番『魔鬼導演』（林超賢暱稱）意願。（林導係你福將？）我2011年出自傳都有寫，林超賢嘅片酬反映唔到佢實際價值，我有信心佢會成為全港導演成績最好嘅一個，佢仲有得再去(o架)！（會否考慮加簽片約？）佢肯就最好，依家個個老闆排隊畀錢佢使。（今次林導有得分紅？）有，我私人都會封利是畀佢，就算于冬（電影另一投資方老闆）唔畀我都會畀，分紅會好可觀，一定夠買樓。」楊受成續稱已跟博納老闆于冬講明會加林超賢片酬。
為港爭光
對於老闆踢爆有其他投資者「捧錢」去跟他合作，林導受訪時笑說：「咪聽佢講，不嬲都有。（楊先生話你今次終於有分紅喎？）應該（佢話夠你買樓。）佢旗下有個樓盤啲樓7,000幾萬，叫我去睇吓，又話慢慢同我計，聽到都驚呀！咁即係要拍多幾多部呀？（同英皇仲有幾多部電影約？）3部。」談到《紅》片令他成為全球票房最高華語片香港導演，林導謙虛表示：「算為港爭光，但我係沾楊先生嘅光啫！」
文：影視組
|
鍾意就快D Share啦！
|
|
|