人逢喜事精神爽！草蜢成員蘇志威最近屢次傳來好消息，先有名下愛駒「駿王」首次贏頭馬，令蘇志威一家一嘗拉頭馬滋味，再來自家西裝品牌成立五周年，談及品牌，他感謝一班員工近年來的無私付出，由一間店舖擴充至今年的三間，又開心宣布品牌即將參與第二次婚紗展，另外，品牌今年亦都會有多方面的合作，例如會幫大機構的每位員工度身訂造制服，從而對外宣傳，希望可於今年內打入內地市場。
老婆開心到喊
問到首次拉頭馬心情？蘇志威表示非常開心，覺得是一個好兆頭，愛妻劉小慧還激動到喊︰「着住專登為呢隻馬整嘅戰衣，仲搵咗國際知名設計師郭培幫手刺繡。」除了戰衣帶來幸運之外，原來蘇志威專程請來動物傳心師於戰前「開解」駿王，他指之前動物傳心師曾經試過與家中愛犬溝通，發覺好可信︰「隻馬本來以為係嚟度假，佢就話佢知佢係要競賽，知道之後就跑得好叻，今次贏馬都好輕鬆，如果唔係咁花時間好好栽培，我諗佢已經退咗役。」
做個開明好爸爸
蘇志威除了有老闆、馬主的身份外，還是一名開明的爸爸，現今社會人人都話要努力讀書入大學之際，他卻曾於電視節目上撐大女將興趣發展成事業，不必急於讀大學︰「各人有唔同教育方法，有家長望子成龍，就會迫佢哋讀書，的確有啲小朋友唔迫係做唔到，但又唔可以話呢啲家長有錯，佢有佢嘅諗法。而我就係想個女開心快樂，想佢搵到佢鍾意嘅嘢，會支持佢，加上屋企又冇畀負擔，可以喺一個咁好嘅環境之下追夢，難得有夢想，唔係一條鹹魚。」
支持個女進修整甜品
蘇志威笑言可能自己才是怪獸家長，又指非常放心大女年尾獨自去日本進修甜品課程︰「佢依家喺某酒店餅房做緊，問佢辛唔辛苦，佢話唔會辛苦，只係攰，又話好開心有人畀錢學嘢。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
