樂壇校長譚詠麟（阿倫） 率領「明星足球隊」聯同與黃日華、羅家英、吳國敬、泰迪羅賓、林敏驄、劉浩龍及戴志偉等超過三十多位藝人、歌手及足球員出席「Now TV x ViuTV 2018 FIFA世界盃」啟動禮，為四月起播出的世盃遊戲節目《Good Night Show全民星戰》進行熱身。台上阿倫稱睇好法國，因超多球星，黃日華就說睇好阿根廷因想美斯捧盃，劉浩龍說要代表埋李克勤和梁漢文要撐英格蘭，卻被林敏驄（阿驄）潑冷水說：「咁你返屋企等消息喇！」而阿驄稱為活動與阿倫寫了一首新歌《我們的夢》，還踢爆阿倫：「原本佢寫嘅，佢又寫唔好。」阿倫抵死神回：「你寫啲嘢去到底線啦，畀個機會你。」引來全場大笑。
準備去睇世界盃
之後阿倫接受訪問，講到已準備6月去現場睇賽事？阿倫坦言：「係準備去睇Opening同埋睇Final。（買咗飛未？）密鑼緊鼓中，Final啲飛緊張啲，知道Opening嘅飛已經開始炒緊飛，我哋會分兩批人去，我頭、尾場都會捧場。（幾錢都要買到？）盡能力」阿倫稱很期待，所以都專登大家錄了首歌支持，入面他更有唱幾句俄文「加油」的打氣說話。
講仔仔即扮傻
問到阿倫的小朋友可會一齊去睇波？他即扮傻笑言：「咩小朋友呀幼稚園嗰啲？流感唔使返學喎。（你個仔呀？）佢唔嚟喇！（冇遺傳你啲足球癮？）佢都鍾意，不過佢要做嘢，好忙冇時間。」講到屆時可會上Now節目做旁述？阿倫說：「睇佢哋安排啦，評述幾句都得，旁述交番畀專業人仕。」而陳百祥（阿叻）最撐的荷蘭隊未能踢世畀盃，阿倫可以盡情笑阿叻？阿倫笑言：「我哋大門為佢而開嘅。（佢喺無綫，即打對台？）冇嘢，都係自己人啫。」
世界盃啟動禮今日於奧海城二期舉辦，宣布賽事直播安排，Now TV將會首次採用4K超高解像度標準，獨家直播全部64場賽事，而Viu TV免費電視台則會直播19場精選賽事，包括6月14日的揭幕戰、兩場四強賽和7月15日的決賽。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
