「樂壇小巨肺」林欣彤（Mag），早前趁年三十晚去年宵市場做Facebook Live宣傳新歌《忍》。花市Plug歌雖然都幾九唔搭八，同落Disco氹BB瞓覺差唔幾，但呢種「嘈吵即熱鬧」、「周圍啲人擘大喉嚨各有各嘈代表個星有人氣」嘅謎思，偏偏又令你喺鬼殺咁嘈嘅環境聲中，明白到歌名嘅意思喎！阿Mag行花市送雞迎狗，總好過佢2017年大除夕晚，喺屎坑倒數！事關網絡爛Gag 都有講，除夕夜切勿去廁所太耐，否則「你出年先返到出嚟！」好彩Mag鑊鑊金，因為本身好忍得先至頂得住，否則真係返唔到出嚟！
「老家」吸靈氣醒晒
講忍，Mag都算係「巨肺忍者」，佢個巨肺唔單止有中氣唱歌掂，面對高山低谷，都因為有器量有容量，否則已經爆肺玩完，連佢都話自己忍得，無論面對愛情或其他問題， 即使幾痛都唔會出一句聲！冇吹水，佢2010年喺無綫《超級巨聲2》一炮而紅，唱鄧紫棋（G.E.M.）嗰首《A.I.N.Y.》，唱到連原唱者嘅風頭都被佢蓋過，之後佢順利出道，橫掃樂壇頒獎禮新人獎，點知就心雄，同「巨聲幫」羅孝勇拍拖，拍戲又撻着陳家樂，搞到分手收場！工作壓力大、外婆患上認知障礙症，令阿Mag抑鬱厭食，體重由115磅暴跌至84 磅，搞到失聲，停工大半年！頭頭碰着黑，喺屋企暈低，下巴一嘢鑿落地下，傷到見骨添！最慘係佢後來翻撻初戀男友，竟然被對方家暴。聲勢又大不如前，約滿無綫、英皇後前路茫茫，幾經轉折，搵王祖藍打救番星途、愛情運同埋個下巴！
本來由大埔紅到出港九嘅阿Mag，經歷咁多人生最痛真係五勞七傷，心肝脾肺腎都搞彎埋，仲好似旅行青蛙咁遊遊蕩蕩荒廢咗幾年光陰，最終要走返大埔，等待時機重新出發。話晒老家大埔始終係Mag嘅地頭，加上人傑地靈，你睇佢老闆王祖藍、視后田蕊妮同天后謝安琪都係大埔人就知啦，Mag養尊處優吸盡靈氣，即刻醒晒！好似早兩個月同陳潔靈合唱澳洲女歌手Sia首《Chandelier》，Mag面對唱功超班嘅陳潔靈，兼夾出場前升降台Chok一Chok，但依然冇怯場，以行動證明巨肺Mag返嚟喇！
揀歌明顯有玄機！
世上有咁多歌手，阿Mag偏偏揀咗Sia嘅歌嚟顯唱功，可能有玄機！事關Sia早幾年開始貫徹唱歌唔見樣嘅作風，唱Live都全程用個背脊「得」住觀眾，阿Mag耐唔耐就被人話整容、變臉，若果效法Sia做唔見樣嘅歌手，就唔使再畀人話佢當年被人家暴，而係中咗失傳咗嘅絕學：還原靚靚拳， 只不過係啲威力慢慢發出嚟咁解啫，所以耐唔耐又變靚！既然阿Mag咁想開演唱會，學Sia 咁背對觀眾，至少可以開少一面台，座位少咗，啲飛渴市咗，定必掀起撲飛熱，拎呢條橋去Sell畀祖藍，應該開得成騷啩！
|
鍾意就快D Share啦！
|
|
|
