歌手何雁詩（Stephanie）今日到粉嶺以球手身份出席女子高爾夫球公開賽新聞發布會，與另一名職業球手陳芷澄即席進行推桿賽熱身，由Stephanie以43秒三球進洞勝出。
接受訪問時，Stephanie表示今次是用業餘身分參加職業比賽：「1月嘅時候參加咗個業餘賽攞咗冠軍，所以就有資格參加呢個比賽。自己隔咗7年幾先再打番比賽。（隔咗咁耐打番有冇陌生？）又冇喎，反而覺得好warm，好似係一位好耐冇見嘅朋友咁。」
打波重拾自信
問到重拾球桿的原因，Stephanie帶點感性地道：「因為上年好似經歷咗好多嘢咁，自己覺得好大壓力，到年頭打番高爾夫球嘅時候先畀番我好大嘅信心。（紓發咗情緒？）都係㗎，我覺得我個人都算係好勝嘅，喺娛樂圈好多嘢都唔係自己控制到，要不停去set好多目標令自己進步，但打波嘅世界就真係全部睇成績，你有幾努力同埋心理嘅狀況能夠調節得幾好，成績就愈好，我覺得係體育同娛樂圈嘅不同之處。（覺得自己娛樂圈成績唔好？）咁又唔係，我啲成績都ok呀！只係覺得好多嘢都唔係自己控制之內啫，係好講運氣同時勢，打波就係睇風勢，至少睇得到同feel到，娛樂圈就未必下下都估計到。」
搵嬲友拉袋
Stephanie說今次的比賽是開放給公眾觀賽，希望有多些fans來撐場。講到即將到美國及加拿大巡唱的男朋友Fred（鄭俊弘），她笑說：「我有問過佢可唔可以幫我拉袋。（佢識打？）佢識嘅，佢嘅姿勢好有型，但就冇咩實際。都要睇佢嘅時間夾唔夾到，隨緣啦。（唔會幫你執波仔？）唔會喇，我諗我要搵個專業啲。（佢有陪你練波？）佢開頭都有嘅，但係我太勤力，同埋佢之後都開始忙，佢要狂練結他，我都陪唔到佢，所以大家各自有各自世界喇，哈哈。」
講到備戰情況，Stephanie指接下來兩個月都會勤力練波：「一定要日日練，如果大家見到我曬燶咗唔好咁出奇！（有信心贏？）真係難啲，贏自己已經夠。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|