今日4月1日是已故巨星張國榮（哥哥）逝世15周年的日子，傍晚6時，一眾「哥迷」在中環文華東方廣場舉行燭光晚會悼念哥哥，現場有逾300「哥迷」，現場設有一個小台，台上有一張寫住「永遠寵愛張國榮」的大海報，亦有用燈牌砌成的白色「LESLIE」字眼及花牌，亦有藍白色紙鶴及玫瑰花籃。開始前播出《今生今世》、《有誰共鳴》等金曲，「哥迷」攞住電子蠟燭邊揮手邊合唱。
宣布不再舉辦燭光紀念活動
悼念活動開始前，「哥迷」代表陳小姐上台，表示15年來大家舉辦過不同活動懷緬哥哥，但宣布明年起不再舉辦燭光紀念活動：「燭光紀念活動原本只係我哋『哥迷』自己發起，多得大家支持，規模愈嚟愈大，今年嚟到15年，我哋想回歸初心，從明年開始『悅榮軒』唔再舉辦燭光紀念活動，but love never ends，我哋會永遠記得Leslie嘅精神同光影，佢嘅完美主義、真善美有如我哋手上嘅燭光，係我哋心中嘅方向，以後我哋會繼續手牽手、心連心奮力向前，繼續熱愛Lesllie。」
漢洋唱《哥哥》
之後歌手漢洋上台唱出《哥哥》，並謂：「6點43分係我哋唔想見到嘅一分鐘，但以後我哋會更記得一分鐘。」然後到了6時43分，全場「哥迷」拿住白蠟燭默哀一分鐘，期間不少「哥迷」眼濕濕，更有人激動落淚，要由友人安慰，然後播出哥哥的一句說話「多謝你哋，希望你哋永遠記得我」，並播出《風再起時》。
用私人方式懷念哥哥
記者上前訪問陳小姐，她表示自己只是「有心人」，並解釋不再舉辦燭光紀念活動，因為今年已是15年，5年是一個折點，想藉此回歸初心：「2003年我哋本身係一班朋友聚埋一齊表達對哥哥嘅思念同傾偈，但多謝大家支持我哋日益壯大，呢15年已經做到目的，哥哥已經深入民心，其實03年前佢已經係華人地區嘅大明星，所以依家希望留番私人空間畀我哋以私人方式懷念哥哥。」她亦謂大家都是同道人、有心人才聚在一起。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|