雨僑冧嫁羅力威拖手到老
英皇歌手羅力威昨日小登科，一擲百萬迎娶蕭定一旗下藝人雨僑，兩人於婚宴上化身接吻魚咀不停，羅力威更向「羅太」講愛的宣言，希望一直拖手到老，並自爆結婚令其「荷包」大傷元氣，暫時未敢實行生B「喜好」。
31歲羅力威與32歲雨僑結束7年愛情長跑拉埋天窗，昨日於淺水灣餐廳舉行簡單而隆重的結婚儀式，沒有任何接新娘的繁文縟節。早上十一時半，一對新人在戶外草地進行簽字註冊，有逾200名賓客到場觀禮。雨僑翹住爸爸的手進場，一對新人宣誓時互望甜笑之餘，更大方咀嘴。眾賓客其後在餐廳內品嘗西式午宴，婚宴上又播出羅力威為大喜日子而作的新歌，及一首由羅力威作曲、和音、雨僑主唱的合唱歌。
7年長跑繼續Sweet
受訪時，羅力威坦言很多事預計不到，連綵排都來不及，行禮時間比原定遲了半小時，幸好過程順利，他說：「所有嘢比想像中更完美，天氣又配合得好好，Live Band時間攞得好準，成個婚禮進度良好。」問到行禮時可有激動到喊？羅力威搞笑說：「日光日白喊嚟做乜，留番今晚飲醉先喊。」雨僑則笑言因好多親友在場，故要堅強管理好情緒。
問到羅力威可有向太太發表愛的宣言？他坦白說：「冇，你哋都知我唔識講嘢，唔係好慣對住佢咁認真講嘢，平時同佢講嘢都傻更更。」雨僑護住老公說：「如果佢咁認真，我可能會笑。」不過羅力威在記者要求下，一口氣發表愛的宣言：「從今日開始我哋唔再係情侶，係夫妻，我會用我最清醒頭腦，令到你嘅生活井井有條，唔會漏低嘢，唔會唔見嘢，我亦都會用我最大嘅氣力或者雙臂將你嘅重擔分擔，希望用只有你明我嘅邏輯，去發揮幽默感令你開心，希望能夠一直拖住你隻手到老，用拍住拖嘅感覺去過結婚生活。」
荷包勁傷蜜月無期
提到蜜月之旅，雨僑笑言因突如其來宣布結婚，已有的工作都已安排到7月，故暫未有時間度蜜月。問到造人大計？雨僑聞言笑稱：「婚禮後要回一回氣先！」而羅力威就打趣比喻生B為一種喜好：「呢樣嘢雖然話係一種喜好，即係問你係咪想生，你話想嘅，咪係一種喜好，其實除咗係喜好都要諗得好清楚嘅。結完婚有啲傷傷哋。（荷包傷傷哋？）係，所以要努力做吓嘢。」問到目標生幾多個？雨僑表示大約一至兩個，惟現階段未是時候：「生唔生都事小，最緊要係點教同養，有咗小朋友就要花多啲時間照顧屋企，依家手上仲有好多工作要完成，等到真係完成晒先再諗。」
文：音樂組
攝：鄭家俊
|
鍾意就快D Share啦！
|
|
|