「生煎皇」蕭潤邦（Oscar）打本逾百萬為未婚妻江若琳（Elanne）開麵館，新店將於本月底開張，現正試業階段，兩人親自落店幫手，期間老闆娘Elanne大顯功架，教Oscar沖黑糖珍珠奶茶，又即場示範拉茶，Oscar亦有試沖奶茶，但一度手腳論盡，搞到Elanne笑他都是煎番生煎包好過，但她仍大讚奶茶好味道，笑言因為本身茶靚，不關他沖茶手法。
之後兩人煙軔同食一碗招牌麵，同啜一條麵，恩愛程度爆晒燈！Elanne又落手落腳推銷派傳單，引來街坊幫襯，其後她更到Oscar的生煎包店踩場，囂張對Oscar手指指，Oscar即以葉問手勢迎戰，兩人搞笑大耍花槍！
潮裝中國飲食文化
對於首次榮升老闆娘，Elanne坦言心情興奮，但亦大壓力，店鋪無論裝修、枱櫈、食物通通都有畀意見，見到試業反應熱烈，她多謝街坊支持，亦為自己打了枝強心針。問首次做生意最難是甚麼？她坦言自己好幸福，因為有Oscar這個大軍師：「所以唔會好似乜都唔識咁，佢會幫我搞掂。」
問為何會有開麵館的計劃？Oscar表示：「啲人叫佢做『生煎皇后』，慢慢就構思點解唔得呢？但生煎包冇得分男同女，只可將菜種變化，我好愛中菜，所以就想用新潮、摩登啲嘅想法去做傳統嘅嘢。」
道理多講足四粒鐘
講到兩鋪在同一條街，問可會爭生意搶客？兩人一開始先笑言要鍊過，之後Elanne才坦言：「其實我哋兩間鋪頭嘢食同風格好唔同，啲人可以街頭食完生煎包，再嚟街尾食麵。」Oscar亦謂：「呢條街好集中，我哋同街坊、唔同鋪嘅老闆係好似friend咁，好良性競爭。」
對於踩過界進軍飲食業，問Elanne是為將來不做幕前舖路？她表示：「唔會，我今朝仲拍劇拍到6點，我好感激佢，佢知我係個停唔到落嚟嘅人，佢問過我有冇諗過10年後會做啲咩，如果冇戲拍演藝事業係咪就冇咗，就會乜都冇，所以不如試吓孕育另一個生命。」Oscar亦補充：「人唔同階段都會唔同，依家想有啲嘢係可以自己捉摸到。」
講到此店是兩人的首個「BB」，Oscar表示：「都真係算，因為有好多嘢係我哋意見，呢間鋪亦係我哋結婚前奏，因為我哋結婚都有好多意見。（有冇試過為開店有拗撬？）有，但好快平息。」
Elanne即踢爆Oscar會講大條道理來說服她：「千祈唔好得罪佢，佢會捉住同你講四個鐘道理，好似訓導老師咁。」講到要打理生意，可會沒時間處理結婚事宜？他們表示距離結婚還有段時間，亦有很多朋友幫忙，所以暫時未緊張。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|