藝人楊愛瑾（Miki）露長腿出席護眼活動，期間與小朋友玩遊戲，讓他們感受失明感覺。受訪時講到囝囝Luken上月尾1歲生日，她開心表示：「時間過得好快，佢依家比BB時更得意，上兩個星期我去咗做嘢3、4日，已經有啲唔捨得佢，愈大個愈唔捨得離開佢，但都同老公傾過，生活要有balance，覺得每年應該有少少二人世界嘅時間會開心啲。（諗住幾時二人世界？）計劃緊，但我真係唔捨得個仔，我個仔依家去咗人哋嘅生日會，我都好想去呀。」問到之前去了工作幾日，可有掛個仔掛到喊？她笑言：「咁又冇，因為我電話9成都係佢嘅相同片，當佢瞓咗冇得視像時，我就會睇佢啲相。」
想追個女
講到護理眼睛，問到平時都有好好保護囝囝雙眼？Miki表示：「作為媽咪見到小朋友身體健康係好滿足，眼睛係其中主要嘅嘢，係靈魂之窗，睇到世界幾咁靚就係靠對眼，所以我好重視囝囝眼睛健康，佢出世到依家我屋企係未開過電視，反而帶佢出去郊外、大自然，唔想畀佢咁快接觸電子產品，因為易令小朋友上癮。」而問到她可已計劃生下一胎？她坦言：「我哋有傾過，都ready。（已經努力緊？）未完全開始努力，想隨緣，但又唔好隔咁耐。（想追個女？）如果個天畀個女我當然好開心，但如果又係仔都好開心，因為好活潑。」
親自恭喜Kary
而講到有傳關係決裂的昔日好姊妹吳雨霏（Kary）再度有喜，Miki表示很戥對方開心：「尤其是我生完之後，覺得小朋友係份禮物，以前係人哋畀愛你多，依家係你畀番愛自己小朋友，呢種愛好偉大，所以知佢有咗都戥佢好開心，作為女仔係好大嘅轉捩點。（有冇親自恭喜Kary？）當然有，有message佢。（佢有覆？）有！」問到可會過幾招湊仔心得給Kary？她笑言：「我依家記性差咗好多，唔記得有冇同佢講過，我依家好健忘，要補下個腦先得。」問到之後可有意約Kary出來聚舊？她坦言：「大家得閒約到當然好，可以聚一聚，但我相信佢應該好忙，因為係第一胎，要準備好多嘢，所以唔急住，幾時都得。（知佢佗仔定女？）冇問呀，等佢自己遲啲講。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|