小肥低調處理感情事，仲話好友陳柏宇太高調，江若琳就太嘔心。
歌手小肥為TVB娛樂新聞台節目《StarTalk》作嘉賓，大談即將舉行演唱會的感受。小肥說：「今次以情歌為主題，緊張係因為得一個鋼琴夾我一把聲，所以好易出事。(要特別保護把聲？) 又冇，可能去少啲夜場，因為喺嗰度講嘢要好大聲，容易傷聲。（始終鍾意飲番幾杯？） 我要放鬆，如果唔係好大壓力，我瞓唔着。」
問到小肥是否常常受情傷致唱苦情歌時感受特別深，他說：「唔係，但試過一次，好似我首歌《寵物》咁，我咩都可以為佢做。（即係兵？）其實佢又冇話要收我做兵，係我一廂情願，由佢最初慢慢耍太極到最後出龜波氣功拒絕我，叫我死心，依家做唔成情侶咪做兄妹囉，好鬼老土。」
期間，他又提到新歌《你明日回來》，小肥說：「首歌係我嘅寫照，講異地戀，講我期待佢返嚟嗰日，其實我哋都還可以，佢返內地工作兩個鐘車程，不過一星期得兩日返嚟，（點解之前冇聽你講拍拖？）我覺得唔需要高調，我又唔會刻意講戀情。（你同年啲新人個個都結晒婚？）哈哈！陳柏宇嗰啲就太高調，江若琳就太嘔心，我有諗結婚，其實大家已經好似一家人咁，不過對方唔肯住。（做過乜嘢Sweet嘢？） 我喺佢知我唔識煮嘢食嘅情況下，煮咗幾味同煲湯，都似模似樣！」
來源 source: http://hk.on.cc
|
鍾意就快D Share啦！
|
|
|
