無綫小花湯洛雯早前喺馬爾代夫嚟個分手後大解放，水着晒腿大派福利，而佢前度羅天宇又慌死呃唔到嬲咁，爆響口話拍拖嗰陣會管住晒，唔畀女友性感，成為唔少網民同宅男眼中釘。呢位「少年食神」、「宅男公敵」，就好似超級英雄電影入面嗰個戴住無限手套嘅大奸角咁令人反感。
慳家拍拖 照冧到女
雖然羅天宇喺幕前都未有咩真正令人印象深刻嘅演出，但佢老哥就已經先後集齊咗苟芸慧、湯洛雯、Coffee（林芊妤）、高海寧同𡃁模盧頌之嗰塊女神寶石，近排又有傳佢想集埋另一女神陳瀅嗰塊添，一個唔覺意真係畀佢成功入到位，呢個「童顏思想老餅男」又再管生晒，到時仲點會有陳瀅全裸影寫真、女僕Look拍劇大講：「我姣你唔起呀？」嘅幸福日子？
無可否認，當唔少男人日夜沉迷打機「食雞」，羅天宇老早就將奮鬥重點放啱咗，佢連「女人殺手」都唔恨做，要做就做「女神殺手」， 幾咁有志氣，所以話吖，能夠成為「少年食神」確係有啲本事嘅，就講番佢同湯洛雯拍拖嗰陣， 去街都只係去觀塘apm咋喎，食嘅係超市平民化美食，咁樣嘅拍拖使得幾多錢吖，偏偏湯洛雯都鬼咁冧冧豬喎，羅天宇唔只唔似得時下嘅港男咁，要喺女友身上花十萬八萬至有得「錫錫」，佢仲直頭可以同居試婚添，事實擺在眼前，真係想話佢唔係搵食奇才都唔得呀。
遭龍頭鍘侍候！
之不過咁，想做「女神殺手」照Dub羅天宇個殼都唔係辦法，就算好似佢咁天生一副Baby Face，令女神望落覺得楚楚可憐咁，覺得呢勻一定係女食硬男，都未算成功，要加埋嗰種成日「無厘啦謂」都尷尷尬尬，鬼鬼祟祟偷番薯嘅神情，咁就Very Good，滿足咗女人終日以為「自己男人又對自己唔住」嗰種癖好，呢啲情趣嚟嘅。若果有埋出身破碎家庭嘅成長背景，就更加Perfect，可以令女神有種惋惜孤兒可憐身世嘅錯覺，淨係交代細個點慘點冇家庭溫暖，就已經贏得姐姐抱抱，只有同時集齊呢幾樣條件於一身，先有望做到「少年食神」。
都係嗰句， 表面睇羅天宇自從《愛．回家》嗰排叫做微微彈起咗少少之後，就一直無以為繼，實則魚與熊掌不可兼得，除非已經衝出名堂，薄有名氣，引得有女自動埋身，否則星途同女途兩者豈可兼得，家陣仲要獨沽一味專食女神，唔作出犧牲又點得呀，不過咁，唔知邊個都係咁痛恨羅天宇，揀咗佢喺無綫新劇《包青天再起風雲》演龐昱，亦即係強拉民女嘅龐大人，一個Baby Face嘅龐大人說服力究竟係點，唔係重點，重點係用龍頭鍘侍候羅天宇，可算係大快網民宅男嘅心呀！
|
鍾意就快D Share啦！
|
|
|