油尖旺區議會日前通過研究旺角「殺街」議案，預計四個月後執行，龍小菌曾經以「蒙面歌手」喺此地獻唱，亦曾因不快經歷表示唔會再返嚟表演。前晚帶同自家樂隊帶菌者嘅樂手Mann重遊舊地，發現多咗霸位文化，要去到街尾先搵到有利位置獻唱，兩人只靠木結他，當然唔及準備咗大喇叭嗌爆咪嘅大媽響亮：「一把人聲，未必因為咁吸引到觀眾去睇，就係因為每個表演者都咁諗，變得大家鬥大聲。如果大聲好聽，聽落舒服冇問題，但大家鬥大聲，只係純粹想蓋過其他表演者，就變得唔係好健康。」
疲勞轟炸
小菌闊別旺角行人專用區舞台五年，雖發現表演者多咗搵食大媽，但唔反對透過街頭表演去搵食。對於噪音問題嚴重，佢都明白居民感無奈：「一路咁玩都會係疲勞轟炸，每日可能最多5至6點，或6至7點，我覺有個限期唔會咁辛苦，亦可訂出某時段玩音樂，當然唔能夠超過噪音限制。」對於「殺街」，佢覺得可惜：「冇咗街頭文化梗係可惜，當呢度太氾濫，冇辦法去控制，就會對側邊商戶、居民造成騷擾同滋擾，都要搵個平衡點。」
撰文：馮仁昭
|
鍾意就快D Share啦！
|
|
|