「曾經有份摰真嘅愛情擺喺我面前，但我無去珍惜，到無咗嘅時候先至後悔莫及，塵世間最痛苦莫過於此。如果個天可以俾機會我返轉頭嘅話，我會同個女仔講我愛佢。如果係都要喺呢份愛加上一個期限，我希望係一萬年。」－－《西遊記之仙履奇緣》
喺《壹》仔嘅目錄入面，以上係其中一場賺人熱淚嘅戲，但睇完日前播出嘅第25集，及今晚（6月25日）將播的第26集《深宮計》，成內侍（韋家雄飾）對南宮琹（康華飾）嘅情深意切，而家個list要加多一項喇！
拍戲拍到喊晒口唔等於好戲，同樣，眼淚都無滴唔等於戲屎，成內侍喺大理寺入面對玲瓏公主（劉心悠飾）講嘅一詞一句，唔需要用一淚一涕去搭配，就足以睇喊唔少家庭觀眾！呢啲咪就係拎完獎但無fans祝賀，卻係名符其實嘅「最佳男配角」囉！
成內侍為咗心愛嘅人，就算死都值得可喜。有一個對自己咁好嘅人，南宮琹又點會不被感動呢，所以喺今晚將播出嘅第26集，南宮琹將會喺成內侍被押解離宮之前見一面，仲會向「男」方表明心跡，願意對食:「同你同念同心同喜同悲，係我南宮琹呢一生最大福氣。我出宮搵你，你返嚟搵我又好，我哋一定會有見面嘅一日，珍重。」死都唔怕，未曾流過一次淚嘅成內侍，此時此刻亦終於淚崩，相信觀眾們你哋今晚又要喊多一次喇！
長係長啲，但成內侍以下一番情深說話，唔聽齋睇字都覺得感動：
「我係真心認罪，衷心希望呢件事隨我伏法而終結，我已無所求，亦無所念，你就成全我最後呢個咁卑微嘅心願啦。我有事唔緊要，最緊要佢唔好有事，而家難得可以為自己所愛而死，其實亦都係一件可喜嘅美事。只要佢平安無恙，依然食得是福，著得是祿，瞓得好生肉，再難過亦都會過，你就由得我去啦。件事確實與南宮司設無關，成恭實在唔忍心睇佢含冤受辱，如果今次件事必須要有個人承擔罪名，呢個人成恭甘願去做。唔後悔，好多人以為身為宦官，早已斬七情斷六慾，不懂情愛，但我哋都係人，我哋知道咩叫幸福、咩叫牽掛，能夠為佢付出，我覺得係種幸福，只可惜以後我唔可以再留喺佢身邊，徒添牽掛。我以前一直覺得以後有大把日子，仲趕得切，直至而家我先醒悟，原來拖延、等待，只不過係逃避。最應該做嘅，反而係把握當下，珍惜眼前人。」
來源 source: http://nextplus.nextmedia.com
|
鍾意就快D Share啦！
|
|
|
