【爆相爆片】現年26歲嘅吳若希奉女成婚，去年10月同澳門闊少何兆鴻（Alex）拉埋天窗，愛女Giselle都快一歲，一家三口樂也融融。不過，日前佢哋到灣仔食完茶記離去，被讀者陸小姐透過「爆相爆片」分享，直擊吳若希躁底爆老公嘅過程。
等司機接載
當日大約早上11點幾，讀者陸小姐喺灣仔一餐廳門外，見到吳若希一家三口：「我喺對面街，見到佢哋行出嚟，最初係俾佢哋嘅情侶鞋吸引，再望上去先知道係佢哋。」孭Chanel手袋嘅吳若希似闊太，孖老公着Valentino情侶波鞋放閃，兩公婆應該食完早兼午餐離去，企喺街上等司機揸車接載。不過就被讀者爆佢唔識抱BB：「佢抱得好衰，囡囡pat pat墮晒落嚟。佢老公冇幫手抱女，我見到吳若希有啲躁，鬧咗老公兩句，好晦氣咁指手畫腳，我企喺對面街，都聽到佢好似講：『應該等埋先』似乎係話應該等司機車到咗先行出嚟，嗰日都幾熱，企喺條街都辛苦。」面對老婆投訴，兩手攞住購物袋兼孭住背囊嘅Alex就全程頭耷耷冇出聲，不停撳電話催促司機，最後等咗五、六分鐘司機先出現。
|
鍾意就快D Share啦！
|
|
|