62歲金牌綠葉陳榮峻與58歲的吳香倫拍拖三年，黃昏戀修成正果。兩人昨午在堅道聖母無原罪主教座堂舉行婚禮，晚上在九龍灣一間酒樓筵開60席宴請親朋，不少藝人好友到賀。新郎陳榮峻更在四代同堂見證下再為人夫，包括他93歲的母親、三名子女及兩個孫仔，陳榮峻哥哥則從新西蘭返港為他證婚。
現年62歲的陳榮峻與58歲的吳香倫三年前共譜黃昏戀，去年尾陳榮峻在無綫盆菜宴上向吳香倫求婚，昨日兩人終修成正果，下午先在半山堅道聖母無原罪主教座堂舉行天主教婚禮，晚上再於九龍灣一間酒樓設宴款待親友。一對新人在娛圈打滾多年，不少合作過的藝人好友，包括洪永城、徐小鳳、胡定欣、陳展鵬、陶大宇、郭政鴻、袁潔儀、陳美琪、黃日華及陳錦鴻等分別於昨午及晚上到賀。
新娘感動落淚
昨午大概1時半，陳榮峻與吳香倫乘坐火紅平治房車，抵達教堂，陳榮峻落車後，隨即為太太開車門，盡顯紳士風度。新娘吳香倫穿上米色拖尾婚紗，與老公一同步向車頭讓傳媒拍照。證婚儀式開始時，新娘在契爺棠哥陪同下步入教堂，男方證婚人是特地從新西蘭返港的陳榮峻胞兄，而女方則是吳香倫母親。新人宣讀誓詞時，新娘吳香倫一度哽咽感觸，讀完誓詞，新郎陳榮峻溫柔輕吻新娘；之後兩人簽署結婚證書時，新娘再度感動落淚。新郎陳榮峻更是在四代同堂見證下再婚，包括他已屆93歲高齡的母親、長子陳穎霖、一對龍鳳胎Jessica和阿聰及兩個孫兒。
婚禮完結後，一對新人接受親友祝福，並接受傳媒訪問，提到子女送祝福，陳榮峻開心謂︰「啲仔女辛苦過我哋，要為我哋頻撲。」吳香倫亦點頭稱是︰「尤其辛苦大女為我哋打點，佢對我特別細心同照顧，今朝我精神緊張喉嚨痕，佢仲為我準備喉糖。」談到婚禮，陳榮峻表示一切從簡，不過禮節就做足，今晨接新娘時，亦有向岳母斟茶，他說︰「我特別揀呢間教堂，因為我覺得呢度係最莊嚴。」新娘則覺得過程很感動，因為親友分別從美國、加拿大、泰國及內地等來觀禮，她說︰「冇諗過可以同親友分享呢個喜悅，所以忍唔住喊。」老公即安慰道︰「唔使咁激動，簽咗字，你已經係我太太，我係你丈夫。」
地中海度蜜月
陳榮峻透露將赴地中海度蜜月︰「會喺法國上船，太太提議過去馬來西亞，可以順道探望fans，不過我想享受二人世界。」一對新人將於周六凌晨出發，並會玩足十天。
下午婚禮後，陳榮峻與吳香倫晚上於九龍灣一間酒樓筵開60席舉行婚宴，一對新人換上晚裝再現身，更錫足30秒晒恩愛。問兩人會否在婚宴上憑歌寄意，陳榮峻說︰「唔會喇！時間太逼，因為太多賓客，敬酒都成個鐘。太太都唔會，佢今日咁忙，又喊咗幾次，聲都沙埋。」
採訪︰卓寶花
攝影︰仇志德、沈健程
|
鍾意就快D Share啦！
|
|
|