無綫資深藝人陳榮峻及吳香倫拍拖3 年，昨日結為夫婦。新娘子全程感動到喊不停，陳榮峻則Man爆「護妻」，當眾放閃說：「我係你老公嘞！」陳家更四代同堂，包括93歲陳媽媽、陳榮峻三個仔女及兩個孫兒，齊齊整整列席婚禮，以示對一對新人的支持，令前來觀禮的洪永城感動眼濕濕。
現年62 歲的陳榮峻與58歲的吳香倫3年前展開黃昏戀，雙方互相扶持，戀情終開花結果，昨日在堅道聖母無原罪主教座堂行禮，晚上一對新人於九龍灣筵開60席廣宴親朋。人緣甚佳的陳榮峻獲不少圈中好友包括洪永城、羅蘭、阮兆祥及梁舜燕等前來觀禮，見證人生重要一刻；陳家更四代同堂列席，場面熱鬧之餘，亦教人感動。
地中海度蜜月
昨午1時許，一對新人乘坐紅色私家車到達，行禮時吳香倫由契爺牽着進場。到宣讀誓詞，陳榮峻表現淡定，反之新娘子有點激動，哽咽下完成許諾，隨後二人交換戒指並深情咀嘴。簽字時新娘再次忍不住落淚，場面感人。事後一對新人步出受訪，吳香倫透露很多親友在場見證，令她分外感動，眼淚隨即流個不停，陳榮峻聞言即謂：「唔使咁激動，簽咗字，我係你老公嘞！」談到昨早接新娘儀式一切從簡，他說：「去到老婆屋企樓下先布置花車，然後上樓向外母斟茶，冇咩特別儀式。」
他坦言仔女們勞心勞力為他籌備婚宴，吳香倫即說：「好多謝峻哥囡囡對我嘅照顧，儀式開始時我話口乾，佢即刻搵粒糖畀我，好貼心。」婚後兩人將坐郵輪由法國到地中海，展開十日蜜月之旅。到場觀禮的洪永城被感動到眼濕濕，問到送了甚麼賀禮？他忽然感性說：「有心就一個祝福已經係最好，有大家嘅祝福同愛已經足夠。」
黃日華驚老友空虛
晚上喜宴部分，徐小鳳、黃日華等人紛紛現身，吳香倫換上紫色低胸珠片晚裝，與陳榮峻再現身受訪，更應傳媒要求咀足半分鐘。問陳榮峻會否在喜宴上高歌送驚喜給太太？他說：「唔會嘞，相信淨係敬酒都要成個鐘，況且我好攰，把聲又麻麻。」問吳香倫會否上台，陳榮峻代答：「佢頭先狂喊喎，你哋聽吓佢把聲……留番度蜜月上郵輪先，大把時間慢慢唱。」
與陳榮峻相識40年的黃日華坦言戥對方開心：「之前佢單身都驚佢空虛，唔夠振作，上年佢打畀我，話7月10號記住留番畀佢，當時自己都嚇咗一跳，搵到終身伴侶共渡餘生，好難得。」至於身為媒人的黃翠如未能現身，但不忘在社交網留言：「真正美麗的愛情故事，絕對像峻哥和Helen（吳香倫）一樣……哎呀老竇，為你感到幸福，等你度蜜月回來，再慶祝！」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|