組合HotCha成員張惠雅（Regen）今早出發去西藏旅行，點知旅程一開始就荊棘滿途，仲嚇到底褲都濕埋！Regen選擇喺香港出發去廣州坐火車去西藏，但只係到達火車站取票呢段過程佢已經歷咗大大小小唔同波折，足以寫成「歷險記」！佢將呢段刺激嘅經歷同網友分享。
Regen嘅開場白就係「你以為着晒Tee、着晒棉褲入面仲着條孖煙囪、沖晒涼、洗晒頭就可以舒舒服服上火車個（嗰）54小時就可以好歎、好乾淨咁瞓喺張床度？sorry，永遠都唔會有咁順利嘅事發生喺我身上」。Regen到達廣州東站轉乘的士去廣州火車站，一上車就直接同的哥講話去西藏，嚇得的哥話「我車唔到你去西藏」。然後Regen就澄清其實係去廣州火車站。
第一次被拒取票
Regen到達後就開始佢嘅歷險記：「我買咗11:45火車去拉薩，預早咗時間9點半就到咗廣州，咁我就坐低慢慢食早餐啦，食到差不多11點我就去取票喇，點知！！！取票處個職員見我用passport買飛，就叫我拎『入藏紙』，但係我做晒功課，香港人係唔需要入藏紙，所以我好肯定咁話一定唔需要，但係佢好堅持都唔出票畀我，嗰時已經差不多11點10分，最後我嘅堅持之下，佢叫我去售票廳問可唔可以拎，唔ok就退票。」
第二次被拒取票
Regen感到非常唏噓就即刻跑到去售票廳，點知個售票廳好遙遠，而且要出返去仲要不停安檢：「我個背囊係我半個人咁制、好重、最後我嘅潛能係呢個時候衝咗出嚟，喺烈日下來回跑，同無數次拎起個背囊再放低個背囊，好多人排隊 ，我要不停咁唔該人可唔可以畀我行先，首先個樣你要係超級無辜同要超級慘咁，見對方都猶豫嘅時候，你要再加重個力度，最後我好順利去到窗口位。」她續說售票廳仍然堅持唔肯出票畀佢：「我用我成世人都未有過嘅肯定語氣話佢聽，我係唔需要『入藏紙』㗎，終於連佢都猶豫自己，入去問問，終於！！佢出票畀我喇😭，嗰時已經11點半，真係好恐怖，通過所有安檢加埋我喺咁危急嘅時候都走錯路嘅情況下，底褲都濕晒」
車廂除晒內衣遇阿叔敲門
上到車嘅Regen以為一切已經告一段落，點知佢又再度被嚇親：「去到車廂，又話冇晒床位得番一張畀我買咗，開車嗰刻，關門！鎖住！我火箭咁快除晒啲褲同Bra，熱到我，當然，都話順利嘅事冇可能發生喺我度，過咗一陣有人敲門，原來係一個阿叔同我同廂，真係嚇到我褲都着唔切，不過那個阿叔唔係普通嘅阿叔，散發出一股親和力嘅氣質，原來佢係西藏人啊，係啊！呢張相係佢影嘅，但係喺我講緊嘢嘅時候，好喇！我終於安全上到火車，西藏見」
網友睇完Regen呢段驚險長文後，都話：「你嘅人生好傳奇，一路小心吖喂」、「笑到我肚痛」、「好正！！😂呢個故事可以拍個微電影😁」
|
鍾意就快D Share啦！
|
|
|