23歲o靚模謝芷蕙（Cammi）出道至今，事業都唔及感情來得進取，Cammi寂寂無名時，因為啜爆陳冠希相片流出，馬上成為新聞焦點，雖然兩人最後分手收場，但Cammi贏盡知名度，成功上位。
Cammi孭住「陳冠希舊愛」之名，男友越識越有米，14年搭上大陸富二代B先生，Cammi不避嫌網上貼相放閃，甜蜜戀人出入五星級大酒店食好西，當年封盤Cammi仲得到男友打本俾佢搞時裝生意，Cammi仲長住廣州，冧爆男方家長，佢哋拍咗4年拖，去年底分手，Cammi話大家性格唔夾，女方再開盤求偶。（新聞連結： https://bit.ly/2CoLDBR ）
甩拖Cammi，今年5月接受《蘋果》訪問，佢聲稱要喺事業上重新出發，仲話以前拍拖嘥咗好多時間，早前簽咗國內新經理人，諗住北上發展。點知話口未完，有讀者陳小姐透過《蘋果》嘅「爆相爆片」，分享咗Cammi拖新歡去東京照片，陳小姐今日接受電話訪問時話：「呢個月3號朝早8點幾，我哋喺去築地方向地鐵見到Cammi同男友，最初唔確定佢㗎，佢戴咗口罩，你知啦，佢個樣成日變。佢哋拖埋個篋坐車，唔知係咪啱啱落機，Cammi同男友喺車廂幾親暱，又攬又拖。我咁啱又係去築地，落車時又撞番，嗰男仔負責拖篋，Cammi全程手揈揈，幾公主吓。我哋求其想搵間餐廳，行咗轉揀好入一間，點知見到佢哋已入咗去坐低食，費事佢以為我哋跟佢，我哋冇入同一間。」
根據讀者陳小姐提供嘅相片同短片，Cammi同男友都衣着好casual，男仔個樣有啲似「年青版魯振順」，新歡好man咁搭住Cammi膊頭，而佢就好小鳥咁挨入對方懷中，點睇都係熱戀情侶啦，佢哋全程都係面對面咁企，相信眼中只有對方，拉低咗口罩嘅Cammi，臉容有倦意，相信佢喺坐凌晨出發，爭取時間去東京，落機即趕去食魚生飯。年青版魯振順對Cammi服侍周到，再沐浴愛河嘅Cammi又變番公主。
Cammi喺9月3號真係喺社交網貼咗相去東京，佢留言：「我最愛的城巿，一年沒來了。」Cammi貼咗喺酒店check in後相片，玻璃窗外望到東京鐵塔，佢呢張相着嘅紅色吊帶衫，正正喺讀者陳小姐爆相爆片同一件衫，Cammi連日都有貼出喺東京食好西相片。
精選娛聞，喺晒《娛果》
http://fb.com/appledailyent
| （讀者提供圖片、ig圖片） | | |
| | | |
|
鍾意就快D Share啦！
|
|
|