深情大叔53歲韋家雄和55歲黃德斌齊齊做老襯，兩位鐵漢外形，粗中帶幼的內心，均贏得嫩妻芳心，前者晒瀑布感動婚紗照，以表死過翻生終能覓得真愛；後者昨日則低調與愛情長跑13年的圈外女友註冊完婚，整個過程「快、靚、正」，據知以自助餐形式進行的酒會，結帳只需約5萬元！
無綫藝人韋家雄下月再做老襯，53歲的他曾經失婚，今次被年輕近廿年的「銀行之花」鄧楚雅（Keynes）成功俘虜，拍拖不足一年，決定閃婚，已定於10月6日假酒店筵開25席喜酒，宴請圈內外親友。
重遊成長地
娶得嫩妻的家雄當然要影靚靚婚紗相留念，穿上婚紗的Keynes樣靚身材正， 難怪大叔之年的家雄都心情興奮，笑得比新娘更要燦爛！他昨日接受電話訪問，表示今次帶老婆返自己兒時長大的華富邨取景，與愛人重回快樂成長地，一齊遊歷他的回憶，相當浪漫，其中一張相在瀑布前深情留影，原來有一段死過翻生的故事，甚為感動。他說：「嗰時我細個，同一班小朋友玩，去到呢個瀑布灣游水時，差啲浸死呀！呢個地方好難忘，所以我哋要喺度影相留念！」
冇咁快雙喜臨門
他稱當日帶埋Keynes領養的愛犬影相，視狗狗為家人般看待的他，被問婚後可會快快生B ？他卻稱先過二人世界，暫未計劃生育。
與前妻育有一子韋庭鋒的家雄稱，現年27歲的兒子與「未來媽媽」相處融洽，據知其子與女友亦感情穩定，眼見老竇完婚，自己都唔執輸，亦有結婚打算，問到家雄是否做完新郎再做新老爺，雙喜臨門？ 他說：「佢哋（兒子和其女友）感情好好，係有計劃結婚，不過唔會咁快，應該明年或者後年！」
黃德斌婚禮平靚正
55歲的黃德斌與39歲圈外女友Joyce Wong上月被本報率先披露入紙申請結婚，事後他受訪講過結婚一切從簡，主要跟家人簡單食飯，果然言出必行，昨日與Joyce於金鐘一家酒店低調舉行註冊儀式兼結婚酒會，據知酒會以自助餐形式進行，連酒水結帳只需約5 萬元， 絕對是「快、靚、正」！
抱B晒母愛
一對新人以「紅白藍」情侶裝便服現身，當中有來賓帶同BB 到場，Joyce 即母愛氾濫，抱住BB拍照，之後德斌獨自接受傳媒訪問，問他們為何不穿西裝和婚紗？ 他說：「已經着咗影婚照，今日只係同親戚朋友開Party食吓嘢，所以簡便啲。」至於婚禮為何如此低調？他笑說：「不嬲都係咁。」又澄清跟Joyce拍拖只有13年，並非18年。問到如何維繫感情？他竟笑稱不知道：「大家一齊咪一齊，唔知點答你，哈哈！」但他指老婆很了解其性格，婚前婚後都會互相欣賞、遷就、信任和尊重。問為何突然結婚？他笑說：「冇㗎！你哋成日問我，我話隨時都得，冇話定幾時。」對於生小朋友，他則指隨緣，婚後第二日要復工，未有計劃度蜜月。德斌夫婦其後於7 時許離開酒店，他先安排親友上車，Joyce 則躲於大堂，再會合老公離場。
麥子樂：突然請飲
一班圈中好友包括麥子樂、趙希洛和監製戚其義等有到場祝賀一對新人，麥子樂約於晚上7時離開，表示跟一對新人稔熟，故只是封利是沒有送禮：「祝百年好合，永結同心。」問有否祝早生貴子？他說：「唔祝呢啲，最緊要白頭到老，同一對新人識咗好多年，佢哋好恩愛，相處好好，頭先佢哋同一班朋友都好開心。」不過他坦言這場婚禮有點突然，自己是臨時收到通知。而趙希洛則稱入行首套劇是跟德斌合作，大讚他是好男人，很有風度。
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|