【爆相爆片】陳冠希舊愛謝芷蕙（Cammi）四年前戀上內地富二代，曾獲對方打本搞時裝生意，但喺上年年尾因性格不合分手。但Cammi最近又有新歡喇。讀者陳小姐透過《蘋果》「爆相爆片」，分享Cammi拖新歡去東京嘅相。
陳小姐接受電話訪問話今個月3號喺地鐵撞到同樣去築地嘅Cammi同新歡，最初唔確定係Cammi，陳小姐話：「佢哋拖埋個篋坐車，唔知係咪啱啱落機，Cammi同男友喺車廂幾親暱，又攬又拖。個男仔負責拖篋，Cammi全程手揈揈。」陳小姐提供嘅相同片，見Cammi同男友衣着casual，男友個樣有啲似「年輕版魯振順」，新歡搭住Cammi膊頭，而佢亦好小鳥依人挨住男友，全程面對面企。
澳門做過生意
不過有網民留言爆Cammi有澳門賭廳富商照顧，佢回覆時就大方承認新歡年約30歲：「同佢一齊唔係好耐，想保護戀情，唔好彩俾人影到都冇辦法。我同ex分開咗大半年，遇到個還可以，溝通到、合適嘅想試吓發展。」但就否認對方係賭廳富商，只係以前喺澳門做過生意。問到有冇結婚打算？Cammi話：「同佢一齊幾個月咋，梗係冇結婚打算，大家仲了解當中，未去到好了解。」
|
鍾意就快D Share啦！
|
|
|
