【爆相爆片】現年47歲的劉小慧與蘇志威結婚21年，育有兩名女兒的她，身形依然甚弗。讀者凌小姐透過「爆相爆片」分享小慧近照，當日小慧與11歲細女靖珺現身銅鑼灣，小慧身穿白tee襯紅色短褲騷長腿，甚為吸睛。凌小姐表示：「嗰日傍晚近6點，見到佢好熟口面，睇真啲原來係劉小慧，佢真人幾靚女，keep得幾好。兩母女去買外賣，細女似爸爸多啲，手腳都好瘦。小慧好白淨，腳毛都冇一條，化咗少少妝，一啲都唔似師奶。」
對於被大讚依然靚女，小慧回覆《蘋果》表示：「多謝，我一直有養生，又學緊中醫，當然keep得比較好啲。我一年會辟穀一次，我呢個辟穀係《黃帝內經》嘅。我師傅係中醫師，佢一直帶住我辟穀，唔係就咁唔食嘢，中間仲要做一啲『動工』，朝早吸太陽，下午行山，五日都唔食嘢，只係飲水同吸太陽精華。一年做一次辟穀，我覺得對身體好好。」
大女下月赴日
之前蘇志威曾透露19歲大女君蕎到日本學整甜品，問到大女是否身在日本，小慧說：「大女嚟緊下個月先去日本大阪讀書，我哋8月20幾號過去日本搵樓，啱啱去到風和日麗，走咗就打風。我本來諗住喺大阪買樓，但諗吓放番出去好煩，租畀人又好煩，索性租樓算啦。」
採訪：皓騫
|
鍾意就快D Share啦！
|
|
|