有網民對《跳躍生命線》提出一個問題：「真係TVB拍？」呢個問題係一個讚美。可想而知，大台令觀眾失望咗好耐，而呢套劇亦令觀眾喜出望外。
單以第五集論，以8號風球作為題材，講部分人喺颱風之下不顧安危去玩去工作，出意外後要救護員出動，從中帶出個個都知，但未必個個都實行嘅道理：颱風惡劣環境下，唔應該搵命搏，以免最終害己害人。
好似有位後生仔去追風追浪，拍到片擺上網呃到like以為好威，搞到骨截都在所不惜。不過，佢無諗過隨時害埋冒險出動救佢嘅救護員；無諗過若然自己真係有事，身邊人睇住佢死係一世嘅陰霾，而世人只會笑佢傻仔。
好似有位老闆、工頭，出三倍風糧叫啲打工仔搵命搏，搏到就係一嚿錢，搏唔到就係一世，而且唔係影響一條人命，而係一家人生活。
《跳躍生命線》煽情感人，同時又有教育意義，更重要嘅係仲未見大台劇一貫嘅無謂多角戀情節，難怪有部分本來唔睇好嘅網民都轉軚追捧話係好劇。當然，《跳躍生命線》又未至於完全唔派膠嘅：一班學員搞到消防及救護學院差啲火燭，事後受罰仲駁嘴已經唔合理，但又夾硬做到好有手足患難情咁，扣分。
來源 source: http://nextplus.nextmedia.com
|
鍾意就快D Share啦！
|
|
|