今年聖誕搞咩好？何韻詩搞咗個戶外演唱會，加埋聖誕市集同音樂節，好似出奇蛋咁，滿足晒你三個願望，夠晒創新！「我哋今次揀呢個地方，係科學園入面一個羅馬廣場咁嘅地方，因為今次唔單只係一個演唱會，主要係演唱會，但其實仲有一個聖誕市集，同埋一個音樂節。咁啱喺嗰個廣場上面有一個平台，嗰度會係我哋嘅市集。其實已經喺香港做過好多次演唱會，乜嘢場地都做過，淨係未做過戶外，我都希望可以帶一啲唔同感覺俾觀眾，你知道而家香港嘅騷多到氾濫，所以有一啲唔同嘅嘢可以帶俾大家，同埋我諗香港人好少去睇一啲戶外再加企位嘅搖滾騷，我覺得呢方面真係要灌輸俾大家，其實企唔係辛苦嘅，企喺度其實好好玩。」
仲記得09年嘅時候，阿詩曾經喺男拔萃嘅足球場，搞過一次「快樂是免費的音樂會」，只限5千人入場嘅戶外騷，好有氣氛！「嗰次真係一個免費嘅戶外音樂會，嗰次好簡陋，因為係喺爸爸任教嘅學校，我哋用後面啲乒乓波枱，一啲舊式好穩陣嘅，用咗五張乒乓波枱嚟砌咗一個台出
嚟，當然今次就唔會咁樣啦，今次係一個正式嘅騷嚟嘅。同埋我覺得今次最特別嘅地方係，台上除咗我同音樂總監、我嘅哥哥何丙之外，其他都係一啲年紀好細，二十幾歲嘅音樂人，佢哋本身都係創作人，包括雞蛋蒸肉餅、李拾壹、QET同埋阿Gould。」入行多年嘅阿詩，經歷過唔少嘢，行嘅唔係一條平坦路，究竟佢憑咩對音樂仲係咁熱血？「其實我都唔知，我都成日同啲同事講，我哋點解成日都要搞到自己咁攰呢？因為每次做新嘢，其實好多嘢都要拆解，因為例如喺紅館開騷，好多配套已經準備好，只不過睇你今次做嘅主題係乜。但係今次我哋喺科學園，仲要係三合一，演唱會加音樂節再加市集，嗰件事其實你聽落都覺得好複雜，好多嘢要搞，但係我又唔甘心就咁hea做一個騷俾大家就算數，我覺得唔係純粹想俾一啲新鮮感觀眾，其實我自己都需要變化，所以我諗呢個其實係我嘅構造。」
遇到挫折、失敗，阿詩沮喪過後，會繼續向前行，唔會俾自己倒下來。「我真係一個不斷轉變嘅人，當你轉變嘅時候，就會出現一啲迷惘嘅時候，就算可能一年前兩年前，覺得好通透，所有嘢都明白晒，但因為我唔係停留喺嗰個狀態，我覺得觀眾亦都唔希望你停留喺某一個狀態，所以你要繼續向前嘅時候，你唔係行緊人哋條路，你係開緊一啲路嘅時候，過程中一定會有攰、迷失、脆弱嘅時候，當然我都係人，遇到一啲好灰嘅情況時，其實我都會有失去意志嘅時候，但係我好彩嘅係，我唔會俾自己沉落去，可能我會好頹廢一個禮拜，去到某個位就會提醒唔可以咁樣，要行番出嚟。」
攝錄：蕭敬漁
採訪：肥A、阿芝
來源 source: http://nextplus.nextmedia.com
|
鍾意就快D Share啦！
|
|
|