位於尖沙咀加連威老道的樓上舖，一班嬸嬸正埋頭縫衣。一對對巧手，為劉德華、黎明等天王巨星修補好演唱會戲服，連Lady Gaga當年的經典牛肉裙都出自她們手。坐在縫紉機前手起針落的，正是年逾六十的靚靚 （Dorothy），熟客口中的「尖沙咀時裝救星」。
靚靚廿歲時為製衣女工，直到四十多歲、90年代末用十萬於中環開店改衣，兩個月前在尖沙咀開分店。行事低調的靚靚多年來不怎宣傳，但憑著其超卓的手底功夫，吸引眾多明星如張智霖、鄭欣宜等親身前來改衣。國際品牌如D&G、Prada和Gucci等都選用靚靚為度身、改衣師傅。靚靚自言沒有特別的生意經，謙虛笑道：「都係啲客一個介紹一個姐，幫襯得我哋耐左，覺得我哋改得好睇，就會依賴我哋去改衫。最緊要佢哋著得好睇、著得開心！」
連刁鑽的唱服和牛肉裝都搞得掂，更何況是一般休閒裝，連西裝、皮褸皮草、大褸、晚裝等，她都可以放大縮小且絕無痕跡。「有個客要慶祝五十週年結婚紀念，要著返以前條裙慶祝，佢哋個個肥左八至十吋，搵唔到人改。我話我幫你試下改啦，佢老人家知道我肯改，開心到呢。比我改完之後，仲叫佢個女由美國飛返嚟比我改衫。」最終她花了一個星期完成，她說將一件很大的衣服改得很合身，那種滿足感妙不可言。「啲客仲會特登著返嚟比我睇，話著出去比人讚，我真係鄧佢哋好開心。」
靚靚賣的除了是精湛改衣技術，還有她的時裝觸覺，「50後」的她比任何一個後生仔諳熟時尚。「年輕人鍾意韓風，我可以將佢哋搞到好『韓』，一般佢地都比相我睇，叫我照張相去改。其實韓風都係復古，以前香港90年代都係咁著。」熟客名媛丁何穎雯大呼很幸運找到靚靚，大讚她是香港數一數二的裁縫，「一個細改動已經令成套衫唔同曬。」
靚靚認真對待每件衫，甚至比客人更細心著緊。Harold原是靚靚熟客，因為看中她手工了得，逐一同合夥管理店舖。「佢改衫係投入到完全聽唔到其他人講嘢，改白色衫佢一定會戴手套，班姊妹都要咁做，唔係比佢鬧爆。」
Harold口中的姊妹，是靚靚以前在工廠認識的好友。不少姊妹因為以前要湊仔而退出「衣壇」，現在孩子長大成人，靚靚不忍她們工藝無用武之地，故邀請她們出山。「唔想佢哋覺得自己年紀大，就覺得自己無用。佢哋睇住我個仔大，我哋乜都傾，冇秘密。」
對於買幾十元一件衫，速食時裝的人來說，改比買新衫還貴。靚靚卻不認為改衣日漸式微，她說社會不乏對改衫有興趣的後生仔，透露去年有大學生自薦到店內實習，會繼續培育新人。「唔做呢行我覺得好嘥，我都唔知點解我咁鍾意改衫，總之改好一件衫嗰種滿足感真係好大，係用錢都買唔到，我會做到我無能為力，隻手郁唔到為止。」
記者：張怡
攝影：蔡福生、李育明
來源 source: http://nextplus.nextmedia.com
|
鍾意就快D Share啦！
|
|
|