裕美同意大利男友分手消息傳出無耐，隨即就被影到同林作出雙入對，唔通林作係第三者介入，所以先同老外男拜拜？No！No！No！原因只有一個，孝順女，唔捨得丟低多年來相依為命嘅媽媽呀。
據知裕美同意籍男分手，並唔係因為林作或者其他第三者，原因只係好簡單，意籍男要返意大利，更要求裕美跟佢返去過人世，不過裕美同媽媽相依為命慣咗，唔想丟低阿媽一個喺香港生活，想繼續照顧阿媽，所以拒絕並達成和平分手。
裕美咁唔捨得阿媽，其實可以理解，畢竟細個喺日本跟爸爸生活時，兩母女經常過住被打罵嘅生活，直到小六跟住阿媽離開生父返回香港，喺外婆屋企同舅父等親戚一齊逼住生活咗幾年，先成功上到公屋。由於中日混血關係，男同學仔會對裕美產生好奇，但女同學仔就會排斥，甚至成日欺凌佢。阿媽知道個女單親家庭已經唔快樂，喺學校又被同學杯葛，所以盡量想俾個女生活好啲，不惜碌爆卡欠落一身卡數。
大家都知裕美14歲已經出道，一搵到錢就幫手還債，直到25歲左右先找清啲數，佢無怪阿媽，因為明白阿媽都係為佢好先碌爆晒卡。不過大家成年人，好多說話又尷尬唔敢講，搞到兩母女都有過一段關係麻麻嘅時期。近年母女關係好番，裕美唔使開工、拍拖就會陪實阿媽四圍逛。聽聞二人稍後仲會去旅行，而且係兩母女30年以嚟首次「二人世界」出埠。
孝順呢家嘢，唔怕遲，但最好早啲，子欲養而親不在就為時已晚喇！
來源 source: http://nextplus.nextmedia.com
|
鍾意就快D Share啦！
|
|
|