現年34歲的「沈大師」沈卓盈，2002年參加無綫第四屆「《TVB周刊》Cover Girl選舉」奪冠入行，在娘家一做便16年，直到去年底約滿離巢，沈大師上周在Instagram撰文宣佈回復自由身。（新聞連結： https://bit.ly/2Sym44V ）
沈大師在新年伊始，接受新的挑戰，她日前在尖沙嘴接受《蘋果》專訪時說：「我同公司上年年尾完約，02年到18年，唔經唔覺16年啦，呢16年過得好快，當中有甜酸苦辣，唔同回憶，帶畀我成長，所以先有今日嘅自己。上年年頭開始同公司傾續約，我諗咗成年，十五十六好平均，留喺度有一定好處，公司畀咗一個好好嘅平台我去發揮，透過唔同綜藝節目、拍劇，畀好多觀眾見到，令我好安全同放心。畢竟16年喇，好好保護嘅溫室小花，係時候畀自己出去見吓世界，挑戰吓自己。針冇兩頭利，舊年年尾，我就決定離開。當然會唔捨得，有一個樽頸位，我想畀自己有更大嘗試，親自manage吓自己工作。」
沈大師出道時主持兒童節目《放學ICU》，後來主持《最緊要正字》才漸為觀眾認識，過去十年演過《結·分@謊情式》、《賭城群英會》、《平安谷之詭谷傳說》、《特技人》等超過40套劇集，磨練演技。沈大師的知名度得以大大提高，問她可感覺16年演藝人生很風光？沈大師不加思索即答：「我諗冇人覺得做娛樂圈係風光，係都表面風光，有苦自己知。」沈大師在18歲時貪玩參選無綫第四屆「《TVB周刊》Cover Girl選舉」，成為冠軍即入行，她記得返工當天，爸爸豪給她金牛「壓袋」，「爸爸畀咗一千蚊我壓袋，當時我見到一千蚊覺得好多錢，因為做學生，每周零用包搭車、早午餐同買文具，每個禮拜都只係二百蚊，所以一千蚊對我嚟講好多錢，我好感動，就拎住呢張金牛去返工，我同自己講唔可以亂咁使錢，因為屋企人賺錢好辛苦。」
「我初入行返工，出入都係搭地鐵、Van仔再轉城巴，平時買定兩個包，朝早食一個，晏晝食一個，因為趕時間，我會一路搭車，一路食，冇人認得，我都唔介意，我咬住啖包覺得好好味。好多人可能覺我好慘，但我又唔係咁諗，因為我鍾意食包，我鍾意食腸仔包、煙肉包、吞拿魚包，我唔覺得捱苦，我好享受喎。幾夜收工，我又坐番城巴再轉通宵車，唔會立亂嘥錢搭的士，我怕搭慣咗就成日搭，咁開支會好大，一直堅持搭公共交通。」
沈大師自豪用一千元起家，她說：「當年都冇諗過要將呢一千蚊點樣變好多錢，只係諗要好好善用。我呢樣嘢要讚一讚自己，自爸爸喺我出道畀過一千蚊我，自此我冇問家人拎過錢，對我嚟講，唔係要屋企人畀好多嘢我，反而係我可以畀到乜嘢屋企人，所以，我由第一個月出糧開始，即將半份糧畀屋企人，之後呢十幾年都一樣，我會將自己人工一半貢獻屋企，我覺得係時候報答屋企，佢哋養咗我咁多年，我只希望屋企人可以生活舒服啲，o依家都係，呢個係我嘅責任。」其實無綫出名人工奀，沈大師可會入不敷支？雖然要置裝扮靚，但她自問理財有道，「我係要買衫，但都夠使，我平時好慳，出活動啲衫係好靚，我多數買減價貨，我最叻網上格價，上唔同網比較，見到減價嘢先買，開季新衫一定係原價，我會等佢到轉季減價先買定下一季着，減價大量購入，揀多啲唔同款同顏色，方便配搭，咁會平啲。我唔介意着過季衫，其實唔會有人知，最緊要着出嚟靚，咁着出嚟靚咪得。反而開季係咁買會着唔切，到時仲嘥，我衣櫃啲衫會着完再着㗎，環保呀。」
沈大師細數在無綫的甜酸苦辣，她說：「甜係因為好多同事好錫我，有時冇時間食嘢，佢哋會買飯盒同咖啡畀我，真係好窩心。酸係令我諗起拍《怒火街頭》時，我畀楊天經喺泳池㩒頭落水嗰場戲，我唔識游水，咁啱嗰日替身no show，我個頭㩒到落到水底，好辛苦，我細個有浸親陰影，我又唔識呼吸，嗰次飲咗好多啖泳池水，覺得自己好可憐，咪好辛酸囉，好彩拍完，導演收貨。」苦是拍戲時，未必每場都可以做到一百分，她續說：「我事後諗番點解做得唔夠好，揸車返屋企會忟應該做得更好，遺憾到會喊咗出嚟。辣就係挑戰唔同角色，記得拍《古靈精探B》時，監製叫我跳舞，我未問跳乜嘢舞就話好，最終知道係鋼管舞，立即滴汗，始終未接觸過，見到條鋼管唔識埋去，我撞到成隻腳瘀晒，於是的起心肝搵導師學，排咗一段分幾、兩分鐘舞，用一星期速成，真正拍攝時就豁出去，我同自己講咁辛苦學番嚟，唔可以拍唔好，一定要爭氣，終於完成咗。」
採訪：比華利
場地提供：六公館
【編輯推介】
【祖兒跟機貼01年慶功相】Yumiko發現18年前寶藏 Mani：真係非常掛住老爺
https://bit.ly/2simKQt
【陀緊第二胎】城嫂Moka單拖行街 輕露雙下巴被讚小鳥依人
https://bit.ly/2sfL71h
【即將升呢做吳太】父母讚未婚夫乖仔 倪晨曦唔慣要戴訂婚戒指
https://bit.ly/2C7CVo5
【韓流】物業升值1610萬被質疑投機 IU：總有日會得到應有嘅道歉
https://bit.ly/2H0sGaN
【再演洛奇】史泰龍為角色唔准操 收起肌肉扮弱者
https://bit.ly/2Qyek0S
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|