【新增內容】
噚日係李麗珍（珍妹）嘅53歲生日，話晒珍妹喺娛樂圈打滾幾十年，當然識咗唔少好朋友，於是一班朋友相約珍妹一齊慶祝，好姊妹張文慈（Pinky）噚晚喺社交網post咗啲party相，原來佢同埋關禮傑、吳嘉麗、巨聲幫嘅陳國峰、仲有坤哥吳業坤等等，齊齊為珍妹慶祝生日。
Pinky仲post咗同珍妹頭貼頭嘅合照，不過成件事嘅亮點，當然係珍妹凍齡有術啦。珍妹83年入行拍電影，嗰陣已經有唔少人讚佢個樣好pure，點知轉個頭走去拍三級片，由玉女變咗做性感女神，之後又返咗去無綫拍劇、做歌手、拍電影，喺99年仲憑許鞍華執導嘅電影《千言萬語》，成為金馬獎同金紫荊獎嘅最佳女主角。
近年珍妹嘅生活比較清閒，大部份時間喺加拿大陪阿女許倚榕，不過囡囡好快就大學畢業，珍妹話考慮緊究竟拍番戲，抑或係發展自己興趣畫畫，最近珍妹仲搵咗陳國峰做健身教練，話目標係練出人魚線，唔知佢係咪有新搞作呢？
今日珍妹亦有喺Ig留言，佢話：「這七年來都沒特意慶祝，但今年生日過得特別快樂，之前過著一塌糊塗嘅感情生活，使得自己抑鬱了很久，一直都不願意去面對大眾，把自己封閉著，多得一班朋友對我的用心，沒有放棄及離開我，令我終於都開竅，明白到日子都總要過，失去了愛情，但原來身邊還有一班支持我的人，終於明瞭自己並不孤單，多謝朋友們，也希望大家像我一樣，可以走出黑暗，不用怕，再難過的都會過，謝謝！#國峰督促我運動keepFit#坤哥有時指點我唱歌」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|