洪永城（Tony）喺17年同唐詩詠宣佈分手，回復單身嘅Tony寄情工作，直到上個月戀情終於有着落，佢被傳同模特兒兼長跑教練梁諾妍（Inez）撻着，仲有傳媒影到女方到Tony屋企過夜，事後Tony大方承認同Inez了解中，大家識咗幾個月，發展得好順利，希望可以畀啲空間大家！（新聞連結： https://bit.ly/2RgUyw6 ）
雖然Tony同Inez發展咗幾個月，但係呢段感情似乎發展得好穩定，好似最近Tony榮升做業主，有指佢係打算築愛巢，不過佢話買樓只係為自己嘅人生展開新階段，當然亦都係向住呢個目標進發！查實要成家，除咗要有一個安樂窩之外，最好梗係有一個識煮飯嘅人，兩口子返到屋企，可以食餐安樂茶飯！
喺呢個年代，買餸煮飯已經唔再係女人嘅專利，日前《蘋果》喺九龍城見到Tony，同行嘅唔係女友Inez而係男助手，佢哋兩個行咗去街市買餸，唔知係咪為女友親自下廚？話晒早排佢有份主演嘅《大帥哥》口碑都唔錯，搞到好多師奶或者攤檔啲姐姐，爭住同佢合照，仲有啲人邊鬧邊讚，話佢嘅角色好鬼奸，又好乞人憎，Tony聽到即刻笑晒口話：「我真人唔係咁㗎， 好善良！」跟住見Tony去咗菜檔、海鮮檔同乾貨檔，但係見佢好似冇乜頭緒，呢樣又睇吓，嗰樣又望吓，攤檔啲姐姐好似見慣不怪，同Tony齊齊吹水，仲見到佢哋拎晒電話出嚟影相！
Tony嘅廚藝似乎係初哥階段，見到佢喺乾貨檔諗住買材料煲湯，不過唔知點樣配搭，隱約聽到Tony話想煲啲湯用嚟提神，仲係一人份量，結果啲姐姐、買餸啲師奶梗係好細心咁教佢，叫佢執定啲材料，有時間就慢慢煲！大約逗留咗半個鐘左右，Tony同男助手離開街市，揸車走人！
精選娛聞，喺晒《娛果》
http://fb.com/appledailyent
| 攝影：孔志豪、吳耀輝 | | |
|
鍾意就快D Share啦！
|
|
|